Նախընտրելի
ԱՄՆ նախագահ Դոնալդ Թրամփը հայտարարել է, որ քննարկում է վաղեմի մրցակից դերասանուհի և կատակերգու Ռոզի Օ'Դոնելի ԱՄՆ քաղաքացիությունից «զրկելու» հարցը, չնայած Գերագույն դատարանի տասնամյակ առաջ կայացված որոշմանը, որը հստակորեն արգելում է կառավարության նման գործողությունները, հաղորդում է CBS News-ը։
«Քանի որ Ռոզի Օ'Դոնելը չի ծառայում մեր մեծ երկրի շահերին, ես լրջորեն քննարկում եմ նրա քաղաքացիությունից զրկելու հարցը», - շաբաթ օրը Truth Social-ում գրել է Թրամփը։
Նա հավելել է, որ հունվարին Իռլանդիա տեղափոխված Օ'Դոնելը պետք է մնա այնտեղ, «եթե նրանք ուզում են նրան»։
Թրամփը և Օ'Դոնելը տարիներ շարունակ հրապարակավ քննադատել են միմյանց, հաճախ՝ բուռն փոխադարձ վեճերում, որոնք նախորդել են Թրամփի քաղաքականություն մուտք գործելուն։
Օ'Դոնելը նախկինում սոցիալական ցանցերում քննադատել է Թրամփին և նրա վարչակազմի վերջին քայլերը, այդ թվում՝ հարկերի կրճատման և ծախսերի մեծ ծրագրի ստորագրումը։
Շաբաթ օրը Թրամփին պատասխանելով՝ Օ'Դոնելը սոցիալական ցանցերում գրել է, որ ինքը նեղացրել է նախագահին, և «նա ինձ ավելացրել է այն մարդկանց ցուցակում, որոնք ամեն քայլափոխի դեմ են նրան»։
Դերասանուհին ասել է, որ Թրամփը «միշտ զայրացել է այն փաստից, որ ես նրան տեսնում եմ այնպիսին, ինչպիսին նա կա՝ հանցագործ, խարդախ, սեռական բռնության ենթարկող, ստախոս, որը վնասում է մեր երկրին՝ իրեն ծառայելու համար, այդ իսկ պատճառով ես տեղափոխվել եմ Իռլանդիա»։ Օ'Դոնելը տեղափոխվել է Իռլանդիա այն բանից հետո, երբ Թրամփը հաղթել է փոխնախագահ Քամալա Հարիսին։ Նա ասել է, որ իր ընտանեկան ծագման հիման վրա Իռլանդիայի քաղաքացիություն ստանալու գործընթացում է։
Սա Թրամփի կողմից իրեն քննադատող մարդկանց քաղաքացիությունը չեղյալ հայտարարելու վերջին սպառնալիքն է։
Նա նմանատիպ սպառնալիքներ է հնչեցրել իր նախկին դաշնակից միլիարդատեր Էլոն Մասկի դեմ, ընդգծում են լրատվամիջոցները։
Սակայն Օ'Դոնելի իրավիճակը զգալիորեն տարբերվում է Մասկի իրավիճակից, որը ծնվել է Հարավային Աֆրիկայում։ Օ'Դոնելը ծնվել է Միացյալ Նահանգներում և ունի ԱՄՆ քաղաքացիություն ստանալու սահմանադրական իրավունք։ ԱՄՆ Պետդեպարտամենտը իր կայքում նշում է, որ ծնունդով կամ քաղաքացիություն ստանալու միջոցով ԱՄՆ քաղաքացիները կարող են հրաժարվել իրենց ԱՄՆ քաղաքացիությունից՝ որոշակի քայլեր ձեռնարկելով, բայց միայն այն դեպքում, եթե գործողությունը ձեռնարկվում է կամավոր և ԱՄՆ քաղաքացիությունից հրաժարվելու մտադրությամբ, ընդգծում է CBS News-ը։
