նախընտրելի դարձնել
Իսրայելական ռազմաօդային ուժերի կործանիչները վաղ առավոտյան հարվածներ են հասցրել Սիրիայի հյուսիս-արևմուտքում տեղակայված կառավարական ուժերի բազաներին։ Այս մասին հայտնել է Al Mayadeen հեռուստաալիքը։
Նրա տվյալներով՝ ինքնաթիռները հարձակվել են Լաթակիա քաղաքի (Դամասկոսից 320 կմ հեռավորության վրա) մերձակայքում գտնվող 132-րդ մոտոհրաձգային բրիգադի տեղակայման վայրի վրա։ Բացի այդ, հարվածներ են հասցվել նաև Ջաբլեում գտնվող 107-րդ զրահատանկային բրիգադի բազային։ Այս օդային հարձակումների հետևանքների և հնարավոր զոհերի մասին մանրամասներ չեն հաղորդվում։
Հուլիսի 16-ին Իսրայելական ռազմաօդային ուժերը հարվածներ են հասցրել Դամասկոսի և նրա շրջակայքի մի շարք ռազմավարական օբյեկտների վրա։ Դրանց թվում են եղել նաև սիրիական բանակի գլխավոր շտաբի շենքերի համալիրը և Աբու-Ռումմանա թաղամասի Նախագահական պալատը։ Վերջին հարձակումները գիշերային ժամերին իրականացվել են սիրիական մայրաքաղաքի արևմուտքում գտնվող Մեզզա ռազմական օդանավակայանի և Էլ-Մուադամիա արվարձանի վրա։
Չորեքշաբթի կեսօրին Իսրայելի անօդաչու թռչող սարքերը գնդակոծել են անցումային կառավարության ՆԳՆ հատուկ նշանակության ստորաբաժանումների շարասյունը, որը կատարել են Էս-Սուվեյդա քաղաքի (Դամասկոսից 90 կմ հեռավորության վրա) մատույցներում։ Հեռուստաալիքի տվյալներով՝ այս հարձակման հետևանքով ավելի քան 15 մարտիկ է զոհվել և վիրավորվել։
Մինչ այդ, Իսրայելի պաշտպանության նախարար Իսրայել Կացը նախազգուշացրել էր, որ Իսրայելը կշարունակի հարվածներ հասցնել Սիրիային, եթե նրա իշխանությունները հետ չքաշեն իրենց զորքերը Էս-Սուվեյդա քաղաքից և երկրի հարավային հարակից շրջաններից։
