Պետդեպարտամենտի ղեկավարությունն աշխատանքից ազատել է իր աշխատակիցներից մեկին՝ Իսրայելին և Պաղեստինին վերաբերող հայտարարություններում ձևակերպումների շուրջ նրա հետ ծագած վեճերից հետո։ Այս մասին հայտնել է The Washington Post թերթը։

Ինչպես բխում է հրապարակումից, խոսքը Շահեդ Ղորեյշիի մասին է, ով նախկինում ամերիկյան արտաքին քաղաքական գերատեսչությունում  լրագրողների համար Մերձավոր Արևելքի հակամարտությանը վերաբերող հաղորդագրություններ պատրաստելու գլխավոր մասնագետն է եղել։ Նա աշխատանքից ազատվել է օգոստոսի 18-ին։ Պարբերականի տվյալներով՝ դրանից կարճ ժամանակ առաջ նա առաջարկել էր ԶԼՄ-ների համար մեկնաբանություն հրապարակել, որում նշվել է, որ վաշինգտոնյան վարչակազմը «չի աջակցում Գազայի հատվածում պաղեստինցիների հարկադիր վերաբնակեցմանը»։ Այդ առաջարկը մերժվել է։

Բացի այդ, Ղորեյշին այս ամսվա սկզբին առաջարկել է Պետդեպարտամենտի հայտարարության մեջ ներառել Գազայում իսրայելական հարվածի հետևանքով կատարական Al Jazeera հեռուստաալիքի հինգ լրագրողների մահվան կապակցությամբ ԱՄՆ-ի կողմից ցավակցություններ հայտնելու արտահայտությունը։ Իսրայելի բանակն այդ ժամանակ հայտարարել է, որ ոչնչացրել է «ահաբեկիչ Անաս աշ-Շարիֆին, որը ներկայանում էր որպես Al Jazeera հեռուստաալիքի լրագրող»։ Զինվորականների վարկածով՝ նա գլխավորել է պաղեստինյան արմատական ՀԱՄԱՍ շարժման ջոկատներից մեկը և «պատասխանատու է եղել իսրայելցի խաղաղ բնակիչների և զինծառայողների հրթիռակոծման համար»։ Ամերիկյան արտաքին քաղաքական գերատեսչության ղեկավարությունը մերժել է Ղորեյշիի առաջարկը և հայտարարել, որ ցավակցություն հայտնելու կարիք չկա, քանի որ «վստահություն չկա, թե ինչ գործողություններ է կատարել» այդ մարդը։

Ըստ պարբերականի տվյալների՝ տեղի են ունեցել նաև այլ դեպքեր, երբ Ղորեյշիի և Պետդեպարտամենտի ղեկավարության միջև վեճեր են եղել հայտարարություններում ձևակերպումների վերաբերյալ։ Ինչպես նշվում է հրապարակման մեջ, ԱՄՆ պաշտոնյաների շրջանակի թերթի աղբյուրները կարծում են, որ Ղորեյշիի աշխատանքից ազատումը «զգուշացնող ազդանշան է դարձել Պետդեպարտամենտի աշխատակիցների համար» այն մասին, որ նրանց շրջանում «չի թույլատրվի» կտրուկ իսրայելամետ դիրքորոշումից որևէ շեղում։ Գերատեսչության ղեկավարությունը չի պարզաբանել, թե որն է եղել Ղորեյշիի աշխատանքից ազատման պատճառը։