նախընտրելի դարձնել
Եվրոպական հանձնաժողովը քննարկում է Մոսկվայի դեմ Ուկրաինա ներխուժման պատճառով նոր պատժամիջոցների փաթեթի շրջանակում ռուսական հեղուկացված բնական գազի մատակարարման արգելքի առաջարկը, հաղորդում է Reuters-ը՝ վկայակոչելով ԵՄ ներկայացուցչին։
Նոր խթանը հաջորդել է երեքշաբթի Եվրահանձնաժողովի նախագահ Ուրսուլա ֆոն դեր Լայենի և ԱՄՆ նախագահ Դոնալդ Թրամփի միջև հեռախոսազրույցին։ ԱՄՆ-ը մեծացրել է ճնշումը Եվրոպայի վրա՝ Ուկրաինայում Ռուսաստանի պատերազմի ավարտին նպաստելու գործում ավելի ակտիվ դեր խաղալու համար, քանի որ խաղաղության համաձայնագրի հասնելը, թվում է թե, անհնար է, չնայած Մոսկվայի և նրա գործընկերների դեմ պատժամիջոցները խստացնելու վերաբերյալ բազմիցս հնչեցված սպառնալիքներին։
Թրամփի պահանջները ներառում են, որ եվրոպական երկրները դադարեցնեն ռուսական նավթի բոլոր գնումները, և որ դաշինքը սակագներ սահմանի Չինաստանի և Հնդկաստանի վրա, որոնք երկուսն էլ ռուսական հանածո վառելիքի հիմնական գնորդներ են։ Նա միաժամանակ մեծացրել է ճնշումը Մեծ Յոթնյակի և ՆԱՏՕ-ի երկրների վրա, որոնց թվում է նաև ռուսական նավթի գնորդ Թուրքիան։
ԵՄ-ն արդեն քննարկում է ռուսական նավթի և գազի ներմուծումը մինչև 2028 թվականի հունվարի 1-ն ամբողջությամբ դադարեցնելու առաջարկները, իսկ կարճաժամկետ պայմանագրերի արգելքն ուժի մեջ կմտնի հաջորդ տարի։ Ըստ ԵՄ պաշտոնյաների և դիվանագետների՝ նոր պատժամիջոցները, որոնք կլինեն Ուկրաինայի պատերազմի սկսվելուց ի վեր Ռուսաստանի դեմ ԵՄ պատժամիջոցների 19-րդ փաթեթը, ուրբաթ պետք է ներկայացվեն անդամ պետություններին։
Այս փաթեթը սպասվում էր անցյալ ուրբաթ՝ ԵՄ բարձրաստիճան պաշտոնյայի Վաշինգտոն կատարած այցից հետո, սակայն համակարգման ջանքերը այն մեկ շաբաթով հետաձգեցին։
Այս տարվա սկզբին Եվրոպական հանձնաժողովը հետաձգեց հեղուկացված բնական գազի ներմուծման նկատմամբ պատժամիջոցներ կիրառելու ծրագրերը, և ԵՄ-ն փոխարենը պատժամիջոցների փաթեթի շրջանակում արգելեց ռուսական հեղուկացված բնական գազի վերբեռնումը ԵՄ նավահանգիստներում։ Եվրոպայի գազի մոտ 19%-ը դեռևս գալիս է Ռուսաստանից «Թուրքական հոսք» խողովակաշարի և հեղուկացված բնական գազի մատակարարումների միջոցով, 2022 թվականի մոտ 45%-ի համեմատ։ Իսպանիան, Բելգիան, Նիդեռլանդները և Ֆրանսիան ռուսական հեղուկացված բնական գազ են ներմուծում։
«Թուրքական հոսքով» մատակարարվող գազը գնում է Սլովակիա, Հունգարիա և Բուլղարիա։ Ֆրանսիական Total Energies-ը հրաժարվեց մեկնաբանել ընթացող քննարկումները։ Անցյալ շաբաթ Total Energies-ի գլխավոր տնօրեն Պատրիկ Պույանեն հայտարարեց, որ ռուսական գազն անհրաժեշտ է մինչև 2027 թվականի վերջը, «այդ դեպքում մենք կարող ենք հրաժարվել դրանից, քանի որ կարող ենք այն մատակարարել այլ երկրներից՝ առանց գնի վրա ազդելու»։
«Թուրքական հոսքը» դեռևս միակ խողովակաշարն է, որը ռուսական գազ է տեղափոխում Եվրոպա, այն պահից ի վեր, երբ 2022 թվականի սեպտեմբերին պայթյունները դադարեցրին արտահանումը «Հյուսիսային հոսք 1»-ով, իսկ Ուկրաինայի տարածքով տարանցումը դադարեցվեց հունվարի 1-ին։
