ԱՄՆ պետքարտուղար Մարկո Ռուբիոն շնորհավորական ուղերձ է հղել Հայաստանի Անկախության օրվա առթիվ։

«Ամերիկայի Միացյալ Նահանգների անունից շնորհավորում եմ Հայաստանի ժողովրդին Անկախության 34-րդ տարվա կապակցությամբ։ Միացյալ Նահանգներն աջակցում է Հայաստանին՝ մեր արժեքավոր գործընկերոջը, Հարավային Կովկասում խաղաղության, բարգավաճման և կայունության ապահովման մեր ընդհանուր նպատակներն առաջ տանելու գործում։ Մեր ամուր հարաբերությունները հիմնված են ամուր մշակութային կապերի, ընդհանուր սկզբունքների և տարածաշրջանային անվտանգության ու տնտեսական հնարավորությունների նկատմամբ փոխադարձ ձգտման վրա։

Նախագահ Թրամփի նշանավոր գագաթնաժողովը Հայաստանի և Ադրբեջանի միջև և Հայաստանին 145 միլիոն դոլարի օգնություն հատկացնելու ԱՄՆ հայտարարությունը՝ Թրամփի «Ճանապարհ դեպի միջազգային խաղաղություն և բարգավաճում» (TRIPP) ծրագրի իրականացման համար, ընդգծում են մեր երկրի անփոփոխ հանձնառությունը Հայաստանին՝ կարևորելով մեր համատեղ ջանքերը՝ ուղղված տարածաշրջանային կապերի, տնտեսական ներդրումների և անվտանգության ոլորտում համագործակցության ամրապնդմանը։

Մենք ուրախ ենք աջակցել Հայաստանի ճանապարհին՝ դեպի էներգետիկ անվտանգության բարձրացում, առևտրի ընդլայնում և սահմանային անվտանգության ամրապնդում՝ միաժամանակ վերահաստատելով մեր հանձնառությունը Հայաստանի ինքնիշխանությանն ու տարածքային ամբողջականությանը։

Ռազմավարական գործընկերությունը և Նախագահ Թրամփի ու Վարչապետ Փաշինյանի կողմից ստորագրված փոխըմբռնման երկկողմ հուշագրերը մեր ջանքերի հիմնաքարերն են՝ այս ընդհանուր նպատակների իրականացման գործում։ Քանի որ Հայաստանը շարունակում է կառուցել իր ապագան՝ որպես խաղաղության և աճի խաչմերուկ, Միացյալ Նահանգները վերահաստատում է ավելի փոխկապակցված, կայուն և բարգավաճող տարածաշրջան ստեղծելու իր հանձնառությունը»,- ասվում է ԱՄՆ պետքարտուղարի շնորհավորանքում։