Ուկրաինական անօդաչու թռչող սարքերը սեպտեմբերի 22-ի գիշերը հարվածել են Ռուսաստանի կողմից բռնակցված Ղրիմին։ Ռուսական իշխանությունների վերջին տվյալների համաձայն՝ երեք մարդ զոհվել է, 16-ը՝ վիրավորվել։

Ռուսաստանի պաշտպանության նախարարությունը պնդում է, որ «բարձր պայթուցիկ մարտագլխիկներով» զինված անօդաչու թռչող սարքերը հարձակվել են հանգստավայրի քաղաքացիական թիրախների վրա։

Մասնավորապես, բռնակցված Ղրիմի ղեկավար Սերգեյ Ակսյոնովը հայտարարել է, որ վնասվել են «Ֆորոս» առողջարանի տարածքում գտնվող մի քանի օբյեկտներ, ինչպես նաև դպրոցի շենքը։

Ռուսաստանի պաշտպանության նախարարության տվյալներով՝ սեպտեմբերի 22-ի գիշերը Ռուսաստանի մարզերի և Ղրիմի վրայով խփվել է 114 ուկրաինական անօդաչու թռչող սարք։ Դրանցից 25 անօդաչու թռչող սարք ոչնչացվել է Ռոստովի մարզի և Կրասնոդարի երկրամասի, 19-ը՝ Բելգորոդի մարզի և 13-ը՝ Աստրախանի մարզի վրայով, ըստ ռուսական զինվորականների։

Ուկրաինական կողմը դեռևս չի մեկնաբանել Ղրիմի վրա հարվածը։