Ուկրաինայի նախագահ Վլադիմիր Զելենսկու վրա ճնշումը արագորեն աճում է: Կառավարությունում կոռուպցիոն սկանդալի պատճառով նախագահը ստիպված էր ազատել նախագահի աշխատակազմի ղեկավար Անդրեյ Երմակին: Այժմ նախկին զորապետ Վալերի Զալուժնին բարձրացնում է մի հարց, որը նույնքան չափազանց տհաճ է Զելենսկու համար՝ 2022 թվականի փետրվարին պատերազմի անբավարար նախապատրաստությունը։ 
Վալերի Զալուժնին, որն այժմ Լոնդոնում Ուկրաինայի դեսպանն է, 2021- 2024 թվականներին զբաղեցրել է Ուկրաինայի զինված ուժերի գլխավոր հրամանատարի պաշտոնը։ Նա խստորեն քննադատել է Զելենսկու կառավարությանը բրիտանական The Telegraph պարբերականի համար գրված իր հոդվածում: 

«2021 թվականի օգոստոսին ես նշանակվեցի Ուկրաինայի զինված ուժերի գլխավոր հրամանատար։ […] Ռուսական բանակն արագորեն մեծացնում էր իր զորքերի թվաքանակը։ Կրեմլը տարեցտարի մեծացնում էր իր ռազմական բյուջեն, ներդրումներ էր կատարում պաշտպանական արդյունաբերության մեջ և ավելի շատ զենք ու սարքավորումներ գնում։ Մինչդեռ Ուկրաինայում հակառակը տեղի ունեցավ. 2021 թվականին բանակին նույնիսկ ավելի քիչ ֆինանսավորում էր հատկացվել, քան նախորդ տարի։ Դրա պատճառով մեր ռազմական գերատեսչությունը հաջորդ տարի բախվեց լայնածավալ ներխուժման՝ անձնակազմից մինչև սպառազինության վիթխարի դեֆիցիտով»,- գրել է նա:

Զալուժնին նաև դեմ է Ռուսաստանի հետ շտապ համաձայնագրին։ «Եկեք պատկերացնենք, որ Ռուսաստանն ամբողջությամբ գրավել է Դոնեցկի մարզը։ Պատերազմը միևնույն է չէր ավարտվի, քանի որ նրա քաղաքական նպատակը չէր իրականացվի։ Ռուսաստանը ձգտում է ստեղծել պայմաններ, որոնք կհանգեցնեն Ուկրաինայի փլուզմանը՝ միաժամանակ ռազմական, տնտեսական և քաղաքական մակարդակներում»,- գրել է նա։