Հարգելի կառավարություն, dուք հրապարակել եք Արցախյան կարգավորման փաստաթղթեր, բայց չեք հրապարակել Քի Վեսթը: Այս մասին Facebook–ի իր էջում գրել է լրագրող Թաթուլ Հակոբյանը։ Նա, մասնավորապես, նշել է «Փոխարենը հրապարակել եք երբեք պաշտոնական փաստաթուղթ չդարձած տարածքաների փոխանակման տարբերակը, որը ժամանակին տպագրվել է ՀԺ-ում և որը, մինչ այդ, Ազատության հրապարակում մոտ քսան տարի առաջ կարդացել առաջին նախագահ Լևոն Տեր-Պետրոսյանը:

Գուցե առաջիկա օրերին Քի Վեսթը հրապարակե՞ք:

Կխնդրեինք դրանք նույնպես հրապարակել, որպեսզի մանիպուլյացիաների շատ տեղ չմնա:

Արցախյան կարգավորման փաստաթղթերը, սակայն, ամբողջական չեն և ընտրողաբար են: Կան նաև մոլորեցնող սխալներ:

ա/ Առաջին փաստաթղթում նշված է երկու թվական՝ 2016 և 2019: Սա մոլորեցնող է, արդար կլինի, որ 2016 թվականը հանեք և թողնեք միայն 2019 թվականը: Ես գիտեմ, թե ինչու եք այդպես արել, բայց ցանկալի է, որ կասկածների տեղ չմնա:

բ/ Տպավորություն ունեմ, որ Կրակովի սևագիրը ամբողջական չէ:

գ/ Դուք հրապարակել եք Սերժ Սարգսյանի՝ ԱԺ-ում ունեցած ելույթի պատասխանները, ինչը նշանակում է, որ դա չի կարող լինել փաստաթուղթ: Սերժ Սարգսյանի նամակը Վլադիմիր Պուտինին կարևոր է, բայց դա ևս չի կարող առաջարկներ համարվել: Ամեն դեպքում, այո, Սերժի նամակը կարևոր է:

դ/ Կրկնեմ, եթե ունեք Քի Վեսթը, դա էլ հրապարակեք: Քի Վեսթը պաշտոնապես ներկայացվել է կողմերին:

ե/ Մեղրիի և Ղարաբաղի փոխանակման տարբերակը հայերենով է, եթե կարելի է՝ հրապարակեք այն նաև ռուսերենով կամ անգլերենով:

զ/ Եթե պահպանվել է, հրապարակեք նաև Մեղրիի և Ղարաբաղի փոխանակման տարբերակի՝ Հայաստանի տված պաշտոնական պատասխանը:

է/ հրապարակված փաստաթղթերի մեծ մասը շատ վաղուց հրապարակվել են, հետևաբար դրանք չի կարելի համարել գաղտնազերծված:

ը/ ամեն դեպքում, հրապարակված մի շարք փաստաթղթերի ես անձամբ ծանոթ չեմ եղել, և լավ է, որ իմ հետագա ուսումնասիրություններում կօգտագործեմ»։