Ռուսաստանի նախագահ Վլադիմիր Պուտինի և ԱՄՆ նախագահ Դոնալդ Թրամփի հեռախոսազրույցը, որը տևել է մեկ ժամից ավելի, կազմակերպվել է ԱՄՆ-ի նախաձեռնությամբ։ Այս մասին հայտնել են Կրեմլից, տեղեկացնում է «Интерфакс»-ը։

«Հենց նոր ավարտվեց Ռուսաստանի Դաշնության նախագահ Վլադիմիր Պուտինի հեռախոսազրույցը Միացյալ Նահանգների նախագահ Դոնալդ Թրամփի հետ։ Զրույցը կազմակերպվել է ԱՄՆ նախագահի նախաձեռնությամբ, որը ցանկանում էր մեր նախագահի հետ քննարկել ուկրաինական հակամարտության համատեքստում ներկայիս իրավիճակն ու դրա կարգավորման հնարավորությունները»,- լրագրողներին ասել է ՌԴ նախագահի օգնական Յուրի Ուշակովը։

Նա հավելել է, որ Թրամփը «ցանկանում էր քննարկել այդ հարցերը նախքան Զելենսկու հետ դեմ առ դեմ հանդիպումը, որը կայանալու է այսօր ավելի ուշ՝ Ֆլորիդայում»։

«Տրամաբանական է, որ մեկ ժամ 15 րոպե տևած զրույցի սկզբում նախագահները ջերմորեն շնորհավորել են միմյանց Սուրբ ծննդյան և Ամանորի տոների կապակցությամբ, բնականաբար, երջանկություն մաղթել երկու երկրների ժողովուրդներին։ Հետագա ամբողջ զրույցը նույնպես ունեցել է ընկերական, բարյացակամ և գործնական բնույթ»,- ասել է Ուշակովը։