Ինդոնեզիայի նախագահ Պրաբովո Սուբիանտոն հայտարարել է Երրորդ համաշխարհային պատերազմի սկսվելու ռիսկի վերաբերյալ աճող մտահոգության մասին և ընդգծել, որ դրա հետևանքները կզգան նույնիսկ այն պետությունները, որոնք ուղղակիորեն ներգրավված չեն հակամարտություններում։

«Այժմ համաշխարհային մակարդակով տագնապ կա Երրորդ համաշխարհային պատերազմի սկսվելու հնարավորության վերաբերյալ», - ասել է Ինդոնեզիայի առաջնորդը՝ ելույթ ունենալով Կենտրոնական և տարածաշրջանային իշխանության մարմինների 2026 թվականի ազգային համակարգող խորհրդակցության ժամանակ։

Նախագահի խոսքով՝ նույնիսկ չեզոքություն պահպանող երկրները չեն կարողանա խուսափել հնարավոր հակամարտության գլոբալ հետևանքներից, հատկապես միջուկային զենքի կիրառման դեպքում։ Նա նշել է, որ միջազգային սցենարներն ու փորձագիտական գնահատականները մատնանշում են նման հետևանքների անդրսահմանային բնույթը՝ սկսած ռադիոակտիվ աղտոտումից մինչև երկարաժամկետ կլիմայական վնասները:

«Նույնիսկ նրանք, ովքեր ուղղակիորեն չեն մասնակցում, միևնույն է, կտուժեն ռադիոակտիվ մասնիկներից։ Հնարավոր է՝ վարակվեն մեր ձկները, վրա հասնի միջուկային ձմեռ, որը կփակի արևը մեկ կամ երկու տարուց ավելի ժամկետով. փորձագետներն ասում են, որ նման ձմեռը կարող է տևել տասնամյակներ», - նշել է Պրաբովո Սուբիանտոն։

Նախագահը նաև վերահաստատել է, որ Ինդոնեզիան կշարունակի հավատարիմ մնալ ազատ և ակտիվ արտաքին քաղաքականության սկզբունքներին՝ մնալով ռազմական դաշինքներից դուրս և չմիանալով որևէ ռազմական դաշինքի։

Նա ընդգծել է, որ տվյալ կուրսը սահմանադրական սկզբունք է և պետության հիմնադիրների ժառանգությունը։

Միևնույն ժամանակ, Պրաբովո Սուբիանտոն նշել է, որ չմիացման քաղաքականությունը ենթադրում է երկրի պատրաստակամությունը՝  «նախևառաջ սեփական ուժերի վրա» հենվելու մասին։