նախընտրելի դարձնել«Ժառանգություն» կուսակցությունը հանցագործության մասին հաղորդում է ներկայացրել, կապված Մաշտոցի պողոտային հարակից այգում կատարվող շինարարության հետ: Հաղորդումն ուղարկվել է ՀՀ ոստիկանապետ Վլադիմիր Գասպարյանին, գլխավոր դատախազ Աղվան Հովսեփյանին, ՀՔԾ պետ Անդրանիկ Միրզոյանին եւ օմբուդսմեն Կարեն Անդրեասյանին:
Հաղորդման մեջ, մասնավորապես, ասվում է.
«Երեւանի Մաշտոցի պուրակում՝ Մարգարյանի անվան հիվանդանոցի դիմաց՝ Մաշտոցի, Կողբացիի, Արամի եւ Բյուզանդի փողոցների միջնամասում, ընթանում է ապօրինի շինարարություն: Համաձայն լրատվամիջոցների հրապարակումների` Աբովյան փողոցից ապամոնտաժված կրպակների սեփականատերերը ապամոտաժված կրպակները տեղափոխում են վերը նշված տարածք եւ իրականացնում տաղավարների կառուցապատում: Կառուցապատումը տեղի է ունենում Մաշտոցի պողոտայի հարեւանությամբ գտնվող շուրջ 1000 քմ հանրային այգու տարածքում:
Հասարակության ներկայացուցիչների եւ ՀՀ ԱԺ պատգամավորների կողմից թե գրավոր, թե բանավոր պահանջ է ներկայացվել պետական պատկան մարմիններին` դադարեցնել ապօրինի շինարարությունը եւ գործել օրենքի սահմաններում, միեւնույն ժամանակ տրամադրել իրավական հիմքերը` փաստաթղթերը շինարարական գործունեություն ծավալելու համար, սակայն ապօրինի շինարարությունը վերահսկող լիազորություններ ունեցող պատկան մարմինները այդպես էլ որեւէ գործողություն չեն ձեռնարկել` միջամտելու ապօրինի շինարարությանը եւ ոչ մի փաստաթուղթ չեն տրամադրել:
Կառուցապատումն իրականացնելու վերաբերյալ ցուցափեղկ կամ ցուցապաստառ նույնպես տեղադրված չէ:
Ակնհայտ է, որ այգու տարածքում տեղի ունեցող կառուցապատումը փոխում է հանրային այգուն տրամադրված հողի նպատակային նշանակությունը, որն էլ հանգեցնում է շրջակա միջավայրի փոփոխության:
Վերը նշված փաստերը համադրելով եւ վերլուծելով` գտնում ենք, որ խախտվել են ՀՀ առնվազն ստորեւ թվարկված օրենքները.
«Քաղաքաշինության մասին» ՀՀ օրենք
Համաձայն «Քաղաքաշինության մասին» ՀՀ օրենքի 12 հոդվածի` սահմանված է հետեւյալը. «…Քաղաքաշինական գործունեության իրականացմանը հասարակայնության մասնակցության նպատակներն են`ա) պետության, հասարակության եւ քաղաքացիների շահերի փոխհամաձայնեցումը.բ) հրապարակայնության ապահովումը, բացի օրենքով սահմանված դեպքերից.գ) քաղաքաշինական ծրագրերի եւ նախագծերի լավագույն լուծումների ընտրությանն օժանդակելը»:
Համաձայն «Քաղաքաշինության մասին» ՀՀ օրենքի 13 հոդվածի` սահմանված է հետեւյալը. «…Քաղաքաշինական գործունեության իրականացման ընթացքում հասարակայնության ներկայացուցիչներն իրավունք ունեն`
ա) ստանալ ստույգ տեղեկություններ իրենց կենսագործունեության միջավայրի ծրագրվող փոփոխությունների մասին.
բ) մինչեւ հրապարակված քաղաքաշինական ծրագրերի եւ նախագծերի հաստատումը` մասնակցել դրանց քննարկումներին, ներկայացնել իրավական եւ նորմատիվ ակտերով հիմնավորված դիտողություններ, առաջարկություններ, այլընտրանքային նախագծեր եւ ծրագրեր.
գ) հրապարակված քաղաքաշինական ծրագրերը եւ նախագծերը սեփական միջոցներով ենթարկել անկախ փորձաքննության.
դ) դատական կարգով գանգատարկել պետական կառավարման եւ տեղական ինքնակառավարման մարմինների եւ պաշտոնատար անձանց գործողությունները:
Տարածքային կառավարման եւ տեղական ինքնակառավարման մարմինները պարտավոր են ապահովել քաղաքաշինական գործունեության իրականացմանը հասարակայնության ներկայացուցիչների մասնակցությունը:
Հրապարակված քաղաքաշինական ծրագրերի եւ նախագծերի քննարկմանը եւ որոշումների ընդունմանը հասարակայնության ներկայացուցիչների մասնակցության կարգը սահմանում է Հայաստանի Հանրապետության կառավարությունը»:
Համաձայն «Քաղաքաշինության մասին» ՀՀ օրենքի 14 հոդվածի` սահմանված է հետեւյալը. «Կենսագործունեության միջավայրի ծրագրվող փոփոխությունների մասին իրազեկելը. տարածքային կառավարման եւ տեղական ինքնակառավարման մարմինները պարտավոր են զանգվածային լրատվության միջոցներում հրապարակումներով, հասարակական քննարկումներով, ծրագրերի եւ նախագծերի ցուցադրման միջոցառումներով իրազեկել ֆիզիկական եւ իրավաբանական անձանց կենսագործունեության միջավայրի, տարածքի գոտեւորման եւ քաղաքաշինական նախատեսվող այլ փոփոխությունների մասին»:
ՀՀ քրեական օրենսգիրք
Համաձայն ՀՀ քրեական օրենսգրքի 148 հոդվածի` սահմանված է հետեւյալը. «Անձին տեղեկություն ներկայացնելուց հրաժարվելը. անձին՝ անմիջականորեն նրա իրավունքներն ու օրինական շահերը շոշափող եւ սահմանված կարգով հավաքված փաստաթղթերը կամ նյութերը ներկայացնելուց պաշտոնատար անձի կողմից ապօրինի հրաժարվելը կամ անձին այդպիսի տեղեկությունը ոչ լրիվ կամ դիտավորյալ աղավաղված ներկայացնելը, եթե դա տվյալ անձի իրավունքներին եւ օրինական շահերին վնաս է պատճառել՝
պատժվում է տուգանքով՝ նվազագույն աշխատավարձի երկուհարյուրապատիկից չորսհարյուրապատիկի չափով»:
Համաձայն ՀՀ քրեական օրենսգրքի 315.2 հոդվածի` սահմանված է հետեւյալը. «Պետական կամ համայնքային uեփականություն հանդիսացող հողամաuերի ինքնակամ զավթումը, ինչպես նաեւ շենքերի եւ շինությունների ինքնակամ կառուցումը կասեցնելու, կանխարգելելու ուղղությամբ օրենքով սահմանված կարգով միջոցներ չձեռնարկելը,
Պաշտոնատար անձանց կողմից, որոնց վրա իրավական ակտերով դրված է պետական կամ համայնքային uեփականություն հանդիսացող հողամաuերի ինքնակամ զավթումը, շենքերի եւ շինությունների ինքնակամ կառուցումը կասեցնելու պարտականությունը, հողամաuերի ինքնակամ զավթումը, շենքերի եւ շինությունների ինքնակամ կառուցումը կասեցնելու միջոցներ դիտավորությամբ չձեռնարկելը, ինչպես նաեւ հողամաuերը ինքնակամ զավթած, ինքնակամ կառույց իրականացնող կամ իրականացրած անձանց նկատմամբ վարչական իրավախախտումների վերաբերյալ օրենսդրությամբ նախատեսված վարչական պատասխանատվության միջոցները դիտավորությամբ չկիրառելը`
- պատժվում է տուգանքով` նվազագույն աշխատավարձի հազարապատիկի չափով, եւ որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով, կամ ազատազրկմամբ մեկից երկու տարի ժամկետով եւ որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով»:
Հիմք ընդունելով վերոգրյալը` պահանջում ենք օրենքով սահմանված կարգով ընթացք տալ հանցագործության մասին սույն հաղորդմանը` հարուցելով քրեական գործ»:
