ՆախընտրելիՌուսական գազային «Գազպրոմ» ընկերությունը համաձայն է Ուկրաինային գազի համար 10 տոկոս զեղչ տրամադրել: Այս մասին գրում են ռուսական մի քանի գործարար հրատարակություններ` հղում անելով ընկերության անանուն աղբյուրներին:
10 տոկոսանոց զեղչը նշանակում է, որ «Գազպրոմը» «Նավթոգազին» վառելիք կվաճառի հազար խմ-ի համար մոտավորապես 375 դոլար արժեքով, այսինքն հենց այնքան, ինչքան որ նախատեսված է 2012 թվականի «Գազպրոմի» բյուջեով, գրում է «Մոսկովսկի կոմսոմոլեցը»:
«Գազպրոմն» իսկապես կարող է զիջումների գնալ, սակայն փոխարենը պահանջում է 2012 թվականին 33 միլիարդ խմ վառելիք գնելու երաշխիք: Ուկրաինայում ասել էին, որ ցանկանում են ձեռք բերել միայն 27 միլիարդ խորանարդ մետր, գրում է «Կոմերսանտ-Ուկրաինան»:
Ուկրաինայում 10 % զեղչի առաջարկությանը դեռեւս չեն արձագանքել: Ավելի վաղ երկրի նախագահ Վիկտոր Յանուկովիչը հայտարարել էր, որ կպայքարի գազի հազար խորանարդ մետրը 250 դոլար արժեքով ձեռք բերելու համար:
Փետրվարի կեսին հայտնի էր դարձել, որ «Գազպրոմը» 10 %-ով պայմանագրային գինն իջեցրել է մի շարք արեւմտաեվրոպական երկրների համար եւս, գրում է Lenta.ru-ն:
