ՆախընտրելիԴիտարկվում է Nabucco խողովակատարի հզորության եւ երկարության նվազեցման հնարավորությունը: Այս մասին հայտնում է The Wall Street Journal-ը` հղում անելով տվյալ նախագծի իրագործման համար ստեղծված ընկերության կոնսորցիումի անանուն աղբյուրներին:
Nabucco-ի սկզբնական իրագործման նախագիծը ենթադրում էր 3900 կմ երկարությամբ խողովակատարի շինարարություն, որը պետք է Միջին Ասիայի երկրները միավորեր Ավստրիայի հետ` Թուրքիայի, Բուլղարիայի, Ռումինիայի եւ Հունգարիայի տարածքների միջոցով: Nabucco-ի հզորությունը պետք է կազմի 31 միլիարդ խմ գազ: Այժմ կոնսորցիումը մի տարբերակ է դիտարկում, ըստ որի` Nabucco-ի հզորությունը կնվազեցվի երկու անգամ, եւ գազատարը կանցնի միայն Ավստրիայի եւ Բուլղարիայի միջով:
Ըստ հրատարակության տվյալների` Nabucco-ի սկզբնական նախագծից կոնսորցիումը դեռեւս չի հրաժարվել, սակայն շինարարություն սկսելու ժամկետները եւ գազատարի թողարկումն արդեն բազմիցս հետաձգվել են: Այսպես, անցյալ տարվա հոկտեմբերին հանձնման ժամկետը 2017 թվականից հետաձգվել էր մինչեւ 2018 թվականը:
Հիմնական հարցը, որն առայժմ չի կարողանում որոշել Nabucco-ի կոնսորցիումը (որտեղ ներառված են գերմանական RWE-ն, բբուլղարական Bulgargaz-ը, ավստրիական OMV-ն, հունգարական MOL-ը, ռումինական Transgaz-ը եւ թուրքական Botas-ը), խողովակի լրացման ռեսուրսների որոնումն է:
2011 թվականին Եվրահանձնաժողովն ստիպված է եղել անմիջական բանակցությունների մեջ մտնել Ադրբեջանի եւ Թուրքմենիայի հետ տրանսկասպյան գազամուղի նախագծի կապակցությամբ, որը պետք է անցնի Կասպից ծովի հատակով: Սակայն Կասպից ծովի կիսման պայմանագրի բացակայության պատճառով տվյալ նախագծի իրականացումը քիչ հավանական է:
Nabucco-ի հաշվին եվրոպական երկրները հույս ունեն նվազեցնել կախվածությունը ռուսական գազից: Nabucco-ի հիմնական հակառակորդն է համարվում «Հարավային հոսքը», որի շնորհիվ Ռուսաստանը կարող է վառելանյութ մատակարարել Բալկաններ եւ Հարավային Եվրոպա առանց միջնորդների, հիշեցնում է Lenta.ru-ն:
