ՆախընտրելիԱֆղանստանում արդեն երրորդ օրն է շարունակվում են ամերիկյան ռազմական կայաններում Ղուրանի մի քանի օրինակներն այրելու դեմ ուղղված բողոքի ցույցերը:
Փետրվարի 23-ի առավոտյան ավելի քան 600 մարդ Լագման նահանգում ցույցի է դուրս եկել: Ջալալաբադ քաղաքում բողոքի ցույցի են դուրս եկել շուրջ 300 ուսանողներ: Նրանք կրկնել են «Մահ Ամերիկային» կարգախոսը, հաղորդում է «Ալ Ջազիրան»:
Վերջին տվյալներով` զանգվածային ակցիաների հետեւանքով վերջին երկու օրերին Աֆղանստանում արդեն 8 մարդ զոհվել է, 20-ից ավելին վիրավորվել են:
Միաժամանակ, «Թալիբան» շարժումը Աֆղանստանի բնակիչներին կոչ է արել սպանել արեւմտյան քաղաքացիներին:
Ծայրահեղականների առաջնորդ Զաբիուլա Մուջահիդը տեղական լրատվամիջոցներին նամակ է ուղարկել, որով կոչ է անում գրոհել ռազմական կայանները:
«Արեւմուտքի բնակիչներին հարկավոր է սպանել կամ գերի վերցնել: Դա պետք է դաս դառնա, որպեսզի նրանք այլեւս երբեք չմտածեն սուրբ գիրքն անարգելու մասին», - ուղերձը մեջբերում է Reuters-ը:
Հիշեցնենք, Փարվան նահանգի Բաղրամի ռազմակայանում, որտեղ ամերիկյան հատուկ վտանգավոր հանցագործների բանտն է, մի քանի Ղուրան են այրել: Աֆղանցի բանվորներին, որոնք փորձել են կանխել այդ արարքը, ամերիկացիները ցրել են, երկու աֆղանցի սպանվել են:
ԱՄՆ պաշտպանության նախարար Լեոն Պանետան եւ Աֆղանստանի Անվտանգության աջակցության միջազգային ուժերի (ISAF) հրամանատար գեներալ Ջոն Ալենը ներողություն են խնդրել աֆղանցիներից Բաղրամի ռազմակայանում Ղուրաններ այրելու համար:
Պանետան Ալենին հանձնարարել է հետաքննել միջադեպը եւ պատժել մեղավորներին:
