Նախընտրելի
Հայաստանի պետական պահպանության ծառայության ղեկավար Հրաչյա Հարությունյանը տեղյակ է ջրագնդակի Հայաստանի Հանրապետության 2013 թվականի պատանեկան առաջնություն ժամանակ տեղի ունեցած միջադեպից: Այս մասին NEWS.am-ի թղթակցի հետ զրույցում ասաց Հրաչյա Հարությունյանը («Կրակեմ Հրաչ»):
Նա նշեց, որ ոստիկանությունում հետաքննություն է կատարվում, եւ առայժմ չի ցանկանա որեւէ մեկնաբանություն տալ: «Ամեն ինչ հետաքննության ավարտից հետո»,- նշեց նա:
Հարցին, թե ձեր կողմից որեւէ քայլ արվել է նախագահի անվտանգության աշխատակցին պատժելու ուղղությամբ՝ զրուցել եք, նկատողություն եք արել, նա պատասխանեց, որ ամեն ինչ արվում է հետաքննության ավարտից հետո, երբ կապացուցվի իր մեղավորությունը: «Հիմա ես ձեզ պետք է բացատրե՞մ, թե ինչ քայլեր եմ անելու, հետաքննությունը կպարզի ամեն ինչ, եթե մեղավոր լինի, կպատժենք անպայման, կարող եք չկասկածել»
Ավելի վաղ NEWS.am-ը հայտնել էր, որ «Սպիտակ» մարզա-առողջարանային համալիրում, հոկտեմբերի 31-ին ջրագնդակի Հայաստանի Հանրապետության 2013 թվականի պատանեկան առաջնություն ժամանակ ծեծի է ենթարկվել մարզիչ 58-ամյա Ռուբեն Եսայանը: Այս մասին NEWS.am-ը տեղեկացավ ոստիկանությունից:
Մրցել են «Տիտան» եւ «Սպիտակ» թիմերը: 3-րդ խաղակեսի ժամանակ «Տիտան» թիմի ներկայացուցիչներից Գագիկ Հովհաննիսյանը հարձակվել է 58-ամյա Ռուբեն Եսայանի վրա եւ ծեծել, ինչի արդյունքում մարզիչը քթոսկրի կոտրվածք է ստացել:
Ի դեպ, Գագիկ Հովհաննիսյանը, ներկաների փոխանցմամբ, ներկայացել է որպես Հայաստանի նախագահի անվտանգության աշխատակից: Փաստի առթիվ կատարվում է հետաքննություն:
