«Օֆշորի գործով» նախաքննությանը ժամկետը երկարացվել է եւս երկու ամսով: Եթե մինչեւ դեկտեմբերի 15-ին ստացվեն բոլոր փորձաքննությունների պատասխանները, ապա գործի քննությունը կավարտվի եւ այն կուղարկվի դատարան: Այս մասին NEWS.am-ի թղթակցի հետ զրույցում ասաց Աշոտ Սուքիասյանի փաստաբանը՝ Յուրիկ Խաչատրյանը:
Նա տեղեկացրեց, որ բացի Փայլակ Հայրապետյանից Աշոտ Սուքիասյանը առերեսվել է նաեւ ամուսինների հետ, կինը հայ է, իսկ ամուսինը Գերմանիայի քաղաքացի: Բանն այն է, որ նրանք Աշոտ Սուքիասյանին 30 տոկոսով գումար էին տվել, դրա զգալի մասը նա արդեն վերադարձրել էր, իսկ այժմ ամուսինները պնդում էին, թե տոկոսով չեն տվել, պարտքով են տվել եւ պահանջում են լրիվ գումարը: «Ամուսիններով հակասական բաներ էին ասում, բայց կար ստորագրած փաստաթուղթ, որը ֆիքսում էր, որ Աշոտ Սուքիասյանն է ճիշտ»,-ասաց Յուրիկ Խաչատրյանը:
Նշենք, որ դեռ 2009թ. էկոնոմիկայի նախարարության շենքում նախարար Ներսես Երիցյանի մոտ ՀՀ այդ ժամանակ վարչապետ Տիգրան Սարգսյանի գլխավորությամբ հանդիպում-խորհրդակցություն էր կազմակերպվել 23 արդյունաբերական կազմակերպությունների ղեկավարների հետ, որի ժամանակ քննարկվել էր Ռուսաստանի՝ Հայաստանին տրամադրված 500 միլիոն դոլարի վարկը, որից 100 միլիոնը Ռուսաստանը պետք է տար ապրանքային տեսքով՝ ադամանդի հումքով։ Իսկ այդ 100 միլիոնի վարկը պետք է բաժանվեր այդ 23 կազմակերպությունների միջեւ, որպեսզի դրանք սկսեին աշխատել։ Գործարար Փայլակ Հայրապետյանն առաջարկել էր գրավադրել իր 33 մլն դոլար արժողությամբ իր ամբողջ անշարժ գույքը եւ «Ամերիաբանկը»-ից ստացված մոտ 10 միլիոն դոլարը տվել Աշոտ Սուքիասյանին, որն էլ վերցնելով գումարը՝ փախել էր երկրից: 2014թ. փետրվարին Աշոտ Սուքիասյանին հայտնաբերել էին Վրաստանում: Հունիսի 19-ին՝ Վրաստանից Հայաստան արտահանձնվելուց անմիջապես հետո, Աշոտ Սուքիասյանը կալանավորվել էր:
