Տավուշի մարզի Բերդի տարածաշրջանի մարտական դիրքերից մի քանիսի ուղղությամբ հունվարի 23-ի առավոտյան ադրբեջանական բանակի հատուկ նշանակության ստորաբաժանումների կողմից իրականացրած հարձակման հետեւանքով զոհված Արտակ Վաղարշակի Սարգսյանը զորակոչվել էր 2013թ աշնանը: Այս մասին հայտնեցին NEWS.am-ի աղբյուրները: Մեր տեղեկություններով՝ նա 22 տարեկան է, ապրում էր Արարատի մարզի Վեդի քաղաքում:
Զոհված մյուս զինծառայողը՝ լեյտենանտ Կարեն Գալստյանը Տավուշի մարզի Աչաջուր գյուղից էր, 21 տարեկան է, Ռազմական ինստիտուտը ավարտելուց հետո մեկնել էր ծառայության: Ինչ վերաբերում է վիրավոր զինծառայողին՝ Հովհաննես Վարուժանի Ավետիսյանին, նա 20 տարեկան է, զորակոչվել է 2013թ աշնանը, ապրում է Երեւանում՝ Շենգավիթ վարչական շրջանում:
Ավելի վաղ պաշտպանության նախարարի մամուլի խոսնակ Արծրուն Հովհաննիսյանն իր ֆեյսբուքյան էջում գրել էր. «Գիշերվա ընթացքում խախտումների ընդհանուր թիվը անցնում է 300-ը: Հունվարի 23-ին առավոտյան ժամը 9:00-ի սահմաններում ադրբեջանական բանակի հատուկ նշանակության ստորաբաժանումները հարձակում են իրականացրել նաեւ Տավուշի մարզի Բերդի տարածաշրջանի մարտական դիրքերից մի քանիսի ուղղությամբ:
Հայկական բանակի համապատասխան ստորաբաժանումների կողմից ժամանակին հայտնաբերվելով մարտ է սկսվել, որը տեւել է շուրջ կես ժամ: Հակառակորդը կորուստներ կրելով եւ մարտական խնդիրը չկատարելով հետ է շպրտվել, սակայն ցավոք հայկական կողմը ունի երկու զոհ եւ վիրավորներ: Զոհվել են լեյտենանտ Կարեն Արարատի Գալստյանը եւ շարքային Արտակ Վաղարշակի Սարգսյանը»: