Գյումրիում մարտի 7-ի ուշ երեկոյան հնչած կրակոցների գործով ձերբակալվածներ չկան: Այս մասին հայտնեցին NEWS.am-ի աղբյուրները: Գործի շրջանակներում երեկ բերման է ենթարկվել 6 հոգի, նրանք բոլորն ազատ են արձակվել:
Գյումրիի բժշկական կենտրոնի տնօրեն Արմեն Իսահակյանը NEWS.am-ի թղթակցի հետ զրույցում ասաց, որ իրենց մոտ գտնվող Հակոբյան Վլադիմիրի, Գեւորգյան Համլետի եւ Ղազարյան Սմբատի առողջական վիճակները բավարար են, կյանքին վտանգ չի սպառնում, նրանք գտնվում են Վիրաբուժական բաժանմունքում:
Ինչ վերաբերում է «Էրեբունի» բժշկական կենտրոնում գտնվող 3 հիվանդներին, Գյումրիի հիվանդանոցի տնօրեն Արմեն Իսահակյանը NEWS.am-ի թղթակցի հետ զրույցում ասաց, որ առավոտյան զրուցել է «Էրեբունի» հիվանդանոցի փոխտնօրենի հետ եւ տեղեկացրել է, որ Կնյազը Ղազարյանը եւ Գագիկ Ղուկասյանը վիրահատվել են, ունեցել են գանգուղեղային տրավմաներ, երկուսն էլ գտնվում են Վերակենդանացման բաժանմունքում, վիճակները գնահատվում է կայուն ծանր, իսկ Կնյազ Ղազարյանը դեռ միացված է արհեստական շնչառության ապարատին: Կնյազ Ղազարյանի եղբայրը՝ Գագիկ Ղազարյանը, տեղափոխվել է Վիրաբուժական բաժանմունք:
Ավելի վաղ հայտնել էինք, որ Գյումրիի Արցախ թաղամասում` Տերյան փողոցում, գիշերը կրակոցներ են հնչել: Ժամը 23:30-ից մինչեւ 00:30-ը սահմաններում տարբեր վնասվածքներով Գյումրիի բժշկական կենտրոն է տեղափոխվել 6 մարդ: Վիրավորներից 3-ը հրազենային վնասվածքներ են ստացել, իսկ մյուսները վիրավորվել են կտրող-ծակող գործիքներից:
Հիվանդանոց տեղափոխված անձանց ինքնությունը պարզ է` Ղազարյան Սմբատ, Ղազարյան Գագիկ, Ղազարյան Կնյազ, Հակոբյան Վլադիմիր, Գեւորգյան Համլետ, Ղուկասյան Գագիկ: Նրանցից երեքին ծանր վիճակում տեղափոխել են Երեւանի «Էրեբունի» բժշկական կենտրոն։
Երեւան տեղափոխվածներն են Կնյազ Ղազարյանը (հրազենից ստացված գանգուղեղային վնասվածքով), Գագիկ Ղազարյանը (հրազենից ստացված ձախ ուսի հատվածում վնասվածքով) եւ Գագիկ Ղուկասյանը (բութ գործիքով հարվածի հետեւանքով գանգուղեղային վնասվածքով)։
Հիվանդանոց տեղափոխված քաղաքացիները Գյումրիի տարբեր թաղամասերից են՝ Արցախ, Սունդուկյան, Կ. Դեմիրճյան փողոցներից:
Կրակոցները հնչել են Տերյան փողոցում` «Պեգաս» խանութի մոտ: Ըստ «Ազատություն» ռադիոկայանի՝ 2007 թվականին նույն այդ խանութի մոտ տեղի էր ունեցել փոխհրաձգություն` Գյումրիի նախկին քաղաքապետ Վարդան Ղուկասյանի եւ ԲՀԿ-ական Արտաշես Սարգսյանի որդիների ու նրանց ընկերների միջեւ:
