Արմավիրի մարզի Մեծամոր քաղաքի բնակչուհի, հղիության 5-րդ ամսում գտնվող 28-ամյա Նարինե Շարոյանի մահվան մեջ մեղավոր է «Արմավիր» ԲԿ-ում նրան վիրահատած գինեկոլոգ Արմեն Վարդանյանը, որը վիրահատության ժամանակ չի կարողացել կանգնեցնել արնահոսությունը։ Այս մասին NEWS.am-ին ասաց նույն հիվանդանոցի գինեկոլոգ-մանկաբարձ Հասմիկ Հակոբյանը, որը գործով ներգրավված է որպես մեղադրյալ։
Մանկաբարձը հերքում է բժիշկների եւ Նարինեի ամուսնու պնդումները, թե Նարինեի մոտ արնահոսությունը սկսվել է մինչեւ վիրահատությունը. «Մինչեւ վիրահատությունը ստուգել ենք. ջրեր չէին գնացել, արնահոսություն չկար, 3 սմ շերտազատում էր, ինչի դեպքում հնարավոր է պահպանել երեխային, չվիրահատել: Ես էլ ասեցի՝ Արմեն, մեղք ա, մի երեխա ունի, բեր հղիությունը շարունակենք պահպանել: Բայց ինքը ասեց՝ չէ, բա որ հետո մի բան լինի, եւ վիրահատեց: Վիրահատության ընթացքում թույլ տվեց սխալ, չկարողացավ անոթը բռնել, կապել, բաց թողեց, արնահոսություն եղավ: Եթե ինքը չաներ, տենց չէր լինի»։
Բժշկուհու համոզմամբ՝ մեղավորությունը փորձում են իր վրա բարդել, որովհետեւ իր մասնագիտական կարիերան թոշակի անցնելու պատճառով ավարտվել է, մինչդեռ մյուս բժիշկները երիտասարդ են, եւ եթե պարզվի, որ մեղավոր են, չեն կարողանա շարունակել աշխատել:
Հիշեցնենք, որ փորձաքննությամբ պարզվել էր, որ «Արմավիր» ԲԿ-ում վիրահատությունը կատարվել է ուշացումով։ Ըստ փորձագետների՝ հաշվի առնելով Նարինե Շարոյանի հղի լինելը եւ նրա մոտ մինչեւ այդ ախտորոշված «բարդացած մանկաբարձական անամնեզ» ախտորոշումը, անհրաժեշտ էր ի սկզբանե նրան ընդունել ոչ թե ինֆեկցիոն բաժանմունք, այլ մանկաբարձական, որտեղ ժամանակին հնարավոր կլիներ ախտորոշել հղիության հետ կապված բարդությունները եւ փրկել նրա կյանքը։
Հիշեցնենք, որ Նարինե Շարոյանը «Արմավիր» բժշկական կենտրոն էր տեղափոխվել թունավորում ախտորոշմամբ, փսխել էր, այնուհետեւ` ինֆեկցիոն բաժանմունք տեղափոխվելուց հետո նրան կեսարյան հատում էին արել, հեռացրել արգանդը: Վիրահատությունից հետո Նարինեին տեղափոխել էին Երեւանի «Արմենիա» բժշկական կենտրոն, որտեղ նա հուլիսի 2-ին մահացել էր։ 28-ամյա Նարինեն 7 տարեկան երեխա ուներ:
Դեպքի առթիվ «Արմավիր» ԲԿ-ի գինեկոլոգ-մանկաբարձ Հասմիկ Հակոբյանին մեղադրանք է առաջադրվել ՔՕ 130-րդ հոդվածի 2-րդ մասով, այն է՝ բժշկական օգնություն և սպասարկում իրականացնողների կողմից մասնագիտական պարտականությունները չկատարելը կամ ոչ պատշաճ կատարելը, որն անզգուշությամբ առաջացրել է բուժվող հիվանդի մահ կամ մարդու իմունային անբավարարության վարակի հարուցիչով վարակում: Բժշկուհու նկատմամբ խափանման միջոց է ընտրվել ստորագրությունը չհեռանալու մասին: