Հայաստանյան «Զօօ Ֆաունա Արտ» ՍՊԸ-ն պետք է Տանզանիայից Հայաստան տեղափոխեր 61 կապիկները, իսկ այնտեղ ձերբակալված Վարդանյան եղբայրները որեւէ առնչություն չունեն արտահանման եւ իր ՍՊԸ-ի հետ: Այս մասին, այսօր՝ մարտի 26-ին, NEWS.am-ի թղթակցի հետ զրույցում նշել է ընկերության հիմնադիր տնօրեն Արթուր Խաչատրյանը:
«Արտյոմ եւ Էդուարդ Վարդանյաններն իմ ընկերներն են: Նրանք որեւէ կապ չունեն «Զօօ Ֆաունա Արտի» հետ, որն էլ պայմանագրով Հայաստան պետք է տեղափոխեր կապիկներին: Պարզապես մարտի 23-ին Վարդանյան եղբայրները եկել էին օդանավակայան, որ բագաժ ուղարկեին Հայաստան: Գիտեին, որ ինքնաթիռ է գալու, որոշել էին իրերի մի մասն ուղարկել: Այդ պահին ով օդանավակայանում եղել է, ձերբակալվել է»,- NEWS.am-ի թղթակցին ասաց Արթուր Խաչատրյանը:
Էկզոտիկ կենդանիների ներմուծմամբ զբաղվող Արթուր Խաչատրյանը հայտնեց նաեւ, որ իրենք ամեն ինչ արել են օրենքով, բոլոր անհրաժեշտ փաստաթղթերն ունեն եւ իրավունք են ունեցել՝ այդ կապիկներին Հայաստան տեղափոխելու համար:
«Մենք բոլոր փաստաթղթերն ունենք: Անօրինական ոչինչ չենք արել: Չգիտենք՝ ինչ է տեղի ունեցել: Սակայն այս պահին առաջնային է, որ մեր համերկրացիները ձերբակալված են Տանզանիայում: Արդեն փաստաբաններ ենք վարձել, երեքշաբթի էլ նախնական նիստն է լինելու»,- ասաց Արթուր Խաչատրյանը:
Նշենք, որ ձերբակալված Արտյոմ Վարդանյանը Կոտայքի մարզի Ձորաղբյուր գյուղում գտնվող «Ջամբո Պարկ» ռեստորանային համալիրի սեփականատերն է, որտեղ պահվում են բազմաթիվ էկզոտիկ կենդանիներ
Ավելի վաղ հայտնել էինք, որ մարտի 23-ին Տանզանիայի «Կիլիմանջարո» միջազգային օդանավակայնում ձերբակալվել են ազգությամբ հայ 52-ամյա Արտյոմ եւ 44-ամյա Էդուարդ Վարդանյանները: Տանզանական The Citizen պարբերականը հաղորդում է, որ եղբայրները փորձել են բեռնատար ինքնաթիռով Ալբանիա տեղափոխել 61 կապիկ:
Ըստ պարբերականի՝ չնայած Տանզանիայում արգելված է վայրի կենդանիներին երկրից դուրս բերելը, Վարդանյան եղբայրները անհայտ ճանապարհով կարողացել են ձեռք բերել կենդանիներին արտահանելու թույլտվություն:
Հիշեցնենք, որ Արտյոմ Վարդանյանը 2014թ. ամռանը հայտնվել էր սկանդալում: Նրան պատկանող «Ջամբո Պարկում» կապիկներ էին սատկել, ենթադրվում էր՝ էբոլա վիրուսից: Ընթանում է նախաքննություն:
