Թուրքիայի եւ Իսրայելի միջեւ հարաբերությունների կարգավորումը նախատեսող համաձայնագիրը երկու կողմերը ստորագրել են իրենց ԱԳ նախարարություններում։
Թուրքական CNNturk–ը գրել է, թե դիվանագիտական աղբյուրները տեղեկացրել են, որ Թուրքիա–Իսրայել հարաբերությունների կարգավորման համաձայնագիրը Թուրքիայի կողմից երկրի ԱԳՆ–ում մամուլի համար փակ պայմաններում ստորագրել է ԱԳ փոխնախարար Ֆերիդուն Սինիրլիօղլուն։
Իսրայելական կողմից Իսրայելի ԱԳՆ–ում ստորագրել է Իսրայելի ԱԳՆ–ի գլխավոր տնօրեն Դորե Գոլդը։
Նշենք, որ Թուրքիայի վարչապետ Բինալի Յլդըրըմը հայտնել էր, թե Իսրայելը համաձայնագրով փոխհատուցում է վճարելու «Մավի Մարմարա» գործողության ժամանակ սպանված Թուրքիայի քաղաքացիների ընտանիքներին եւ թույլ է տալու 10 հազար տոննա մարդասիրական օգնություն ուղարկել Գազայի հատված։