Հունիսի 1-ից Հայաստանում մեկնարկում են պետական ավարտական եւ միասնական քննությունները: Այս մասին NEWS.am-ի թղթակից հետ զրույցում ասաց Գնահատման եւ թեստավորման կենտրոնի (ԳԹԿ) մամուլի խոսնակ Գայանե Մանուկյանը:
Նա տեղեկացրեց, որ վաղը կանցկացվեն «կենսաբանություն», «ընդհանուր պատմություն» եւ «աշխարհագրություն» առարկաների քննությունները:
«Կենսաբանություն» առարկայի քննության համար դիմում-հայտ է ներկայացրել 1938 (Հայաստանը եւ ԼՂՀ-ն` ներառյալ), «ընդհանուր պատմություն» առարկայի համար՝ 397 եւ «աշխարհագրություն» առարկայի համար՝ 392 դիմորդ:
Երեւանում քննությունները կընթանան 2 քննակենտրոնում՝ թիվ 189 ավագ եւ 14 հիմնական դպրոցներում: Քննությունների առաջին փուլը կավարտվի հունիսի 22-ին` «հայոց լեզու» եւ «քիմիա» առարկաներով:
Նշենք, որ դիմորդները քննությունից հետո պատճենահանված ձեւաթղթերով են դուրս գալու, եւ 1 ժամ անց նրանք կարող են այցելել ԳԹԿ-ի atc.am կայք, որտեղ տեղադրված կլինեն թեստերն իրենց պատասխաններով: Ստեղծվել է եւս մեկ կայք` gtk.am, որին բաժանորդագրվելով՝ դիմորդն իր էլեկտրոնային հասցեին կստանա իր քննության արդյունքը: