Երեւանում 2006-2015թթ վերելակների անսարքության հետ կապված 18 դեպք է եղել: Այս մասին NEWS.am-ի թղթակցի հետ զրույցում ասաց Տեխնիկական անվտանգության ազգային կենտրոնի տնօրենի տեղակալ, Երեւան քաղաքի ծառայության պետ Վոլոդյա Հովսեփյանը:

Նա նշեց, որ 18 դեպքերի արդյունքում եղել է 8 զոհ, 16 վիրավոր: Վոլոդյա Հովսեփյանը նշեց, որ այդ դեպքերի արդյունքում վերելակ շահագործողներին տարբեր տույժերի են ենթարկել, օրինակ՝ տուգանել, կասեցրել գործունեությունը:

Ինչ վերաբերում է վերջին դեպքին, ապա այժմ այդ շենքում վերելակը չի աշխատում եւ հայտնի չէ՝ երբ կլինի, այն կապարակնքված է քննիչների կողմից: Տեխնիկական անվտանգության կենտրոնը այս դեպքի հետ կապված տեխնիկական փորձաքննություն է նշանակել, որը կպարզի դեպքի պատճառները եւ հանգամանքները: Հայտնի է, որ վերելակը փորձաքննություն չէր անցել, ինչի համար նախատեսված է տուգանք՝ 1մլն դրամի չափով: Նախնական տեղեկություններով՝ վերելակի խցիկի վրա հատուկ ամրաններ կան, որից կախվում է ճոպանը, դա կտրվել է, ինչի հետեւանքով վերելակը պոկվել է եւ աղջիկը տեղում մահացել է:

Ավելի վաղ հայտնել էինք, որ մարտի 21-ին, ժամը 13.36-ին ահազանգ է ստացվել, որ Երեւանի Բաշինջաղյան փողոցի 2-րդ նրբանցքի թիվ 1 շենքի վերելակն ընկել է. անհրաժեշտ է փրկարարների օգնությունը:

Դեպքի վայր են մեկնել մեկ մարտական հաշվարկ, ՃԿԿ օպերատիվ խումբը: Դեռեւս չպարզաբանված հանգամանքներում վերելակը պոկվել եւ վայր է ընկել. խցիկում հայտնաբերվել է Ա. Շ.-ի (մոտ 35 տ.) դին: