ՆԱՏՕ-ն կշարունակի աջակցել Թուրքիային հակաօդային պաշտպանության ապահովման գործում, սակայն դա որեւէ կապ չունի ռուսական Սու-24 ռմբակոծիչը խոցելու հետ։ Այս մասին ՆԱՏՕ-ի արտգործնախարարների հանդիպման ժամանակ հայտնել է ՆԱՏՕ-ի գլխավոր քարտուղար Յենս Սթոլթենբերգը, փոխանցում է ՏԱՍՍ-ը։
«Թուրքիան կարեւոր դաշնակից է, մենք երկար տարիներ այնտեղ ենք եղել, եւ այդ աշխատանքը ոչ մի կապ չունի անցյալ շաբաթ ռուսական օդանավը խոցելու հետ»,- ասել է նա։
«ՆԱՏՕ-ի ջանքերի շրջանակներում Իսպանիան Թուրքիայում Patriot տեսակի ՀՕՊ համալիրներ է տեղադրել, ԱՄՆ-ն եւ Մեծ Բրիտանիան մեր դաշնակցի օդային տարածքի անվտանգությունն ապահովող օդանավեր են տեղակայել։ Սրանք Թուրքիային աջակցելու միջոցների մի մասն է, եւ ես ակնկալում եմ, որ այդ ոլորտում նոր որոշումներ կընդունվեն առաջիկա շաբաթ։ Սակայն ես ուզում եմ նշել, որ այդ միջոցները ձեռնարկվում են արդեն մի քանի տարի։ Ինչ վերաբերում է ռուսական օդանավին, ապա մենք պետք է լարվածության թուլացման հնարավորություններ փնտրենք եւ կապեր հաստատենք, որոնք թույլ կտան նախազգուշացնել դրանց մասին»,- ասել է նա։
