ԱՄՆ-ը եւ Թուրքիան համակարծիք են Թուրքիայի հետ Սիրիայի սահմանն ամբողջությամբ փակելու անհրաժեշտության հարցում` նավթի անօրինական տեղափոխման եւ գրոհայինների առաջընթացի կանխարգելման նպատակով, ասել է ԱՄՆ պետքարտուղար Ջոն Քերրին, տեղեկացնում է «ՌԻԱ Նովոստին»:
«Մնում է փակել սահմանի 98 կիլոմետրանոց հատվածը, մենք կատարյալ համաձայնության ենք եկել եւ անհրաժեշտություն չկա քննարկելու հետեւանքները այն մասին, թե ինչպես է պետք գործել սահմանի այդ հատվածը փակելու համար: Թուրքիայի նախագահ Թայիփ Էրդողանը մտադիր է անել դա: Մենք միասին կաշխատենք այդ ուղղությամբ, պատրաստվում ենք մեր զինվորականների միջեւ համապատասխան խորհրդակցություններ անցկացնել դա անելու համար», - Բրյուսելում լրագրողներին ասել է Քերրին:
Նա նշել է, թե «Թուրքիան հետաքրքրված է կասեցնելու նավթի անօրինական տեղափոխումը կամ էլ փակելու գրոհայինների տեղաշարժման ուղիները` երկու ուղղությամբ էլ»:
«Մենք կաշխատենք նրանց հետ հասկանալու համար, թե ինչպես միավորենք օդային ռազմակազմի, դաշինքի եւ թուրքական ուժերի, ինչպես նաեւ տեղում առկա ընդդիմության զինված ուժերի ջանքերը այս տարածքն անվտանգ դարձնելու համար: Ես վստահ եմ, որ դա տեղի կունենա», ասել է ԱՄՆ պետքարտուղարը:
