Երեւանի Միքայելյանի անվան վիրաբուժության ինստիտուտում հունվարի 9-ի գիշերը H1N1 սուր վարակիչ շնչառական հիվանդության (Խոզի գրիպ) հետեւանքով մահացած Թադեւոս Խ.-ն Վրաստանի քաղաքացի էր, աշխատում էր Ռուսաստանի Դաշնությունում:
Մեր տեղեկություններով՝ 52-ամյա տղամարդը հունվարի 1-ին դիմել է Աշոցքի բժշկական կենտրոն, որտեղից 3 ժամ անց նրան տեղափոխել են Գյումրիի բժշկական կենտրոնի Վերակենդանացման բաժանմունք: 2 օր անց հարազատների ցանկությամբ նա արդեն տեղափոխվել է Երեւան:
Նշենք, որ սա վերջին մեկ տարում գրիպի բարդացումից մահացության վեցերորդ, իսկ այս տարվա ընթացքում 3-րդ դեպքն է։
Ըստ առողջապահության նախարարության հունվարի 9-ի տվյալների՝ Հանրապետությունում գրանցվել էր սուր շնչառական վարակներով հոսպիտալացման 662 դեպք, որից 219-ը` թոքաբորբ: Հոսպիտալացված է 85 հղի, որից 20–ի մոտ ախտորոշվել է թոքաբորբ: Հանրապետության վերակենդանացման բաժանմունքներում բուժում է ստանում 83 հիվանդ, որից 7-ը միացված է արհեստական շնչառական սարքին: