Նախագահ Սերժ Սարգսյանն այսօր կառավարությունում էր՝ շնորհավորելու գործադիրի նորանշանակ անդամներին եւ ներկայացնելու այն խնդիրները, որոնք դրված են նոր կառավարության առջև: Կառավարության շենքի առջեւ նրան դիմավորել է վարչապետը: Իսկ արդեն գործադիրի նիստերի դահլիճում նախագահը խոսել է սահմանադրական բարեփոխումների, դրանց ընդունումից հետո երկրում սկսված համակարգային փոփոխությունների մասին: Նախագահի խոսքով՝ նոր կառավարությունը պետք է դառնա այս փոփոխությունների լոկոմոտիվը. կառավարության հաջողությամբ են պայմանավորված այն ակնկալիքները, որ այսօր ունի ժողովուրդը։
Սյունիքի մարզպետ Սուրիկ Խաչատրյանն ազատվեց աշխատանքից: Որոշման նախագիծն այսօրվա Կառավարության նիստում ներկայացրել է Տարածքային կառավարման եւ զարգացման նախարար Դավիթ Լոքյանը: Ճակատագրի հեգնանքով, երկրորդ անգամ Սուրիկ Խաչատրյանին մարզետի պաշտոնում փոխարինելու է Վահե Հակոբյան անուն-ազգանունով անձը, այս անգամ նա Զանգեզուրի պղնձամոլիբդենային կոմբինատի գործադիր տնօրենն է: Անդրադառնալով սկանդալային մարզպետի հրաժարականի հարցին՝ Էդուարդ Շարմազանովը նշել է, որ դա պայմանավորված էր իշխանության որդեգրած նոր քաղաքականությամբ, նոր մոտեցումների, նոր պահանջների հանգամանքով:
Տիգրան Մուկուչյանը վերընտրվել է Կենտրոնական ընտրական հանձնաժողովի նախագահի պաշտոնում: Ազգային ժողովում այսօր փակ, գաղտնի քվեարկությանը մասնակցել է 103 պատգամավոր, նրանցից 96-ը կողմ է քվեարկել, 4-ը՝ դեմ, 3 քվեաթերթիկ անվավեր է ճանաչվել: Վերընտրվել են նաեւ ԿԸՀ անդամները:
Մամուլի հրապարակումների համաձայն՝ երեկ երեկոյան Ծառուկյանի եւ ԲՀԿ վերնախավի հանդիպում է տեղի ունեցել: Քննարկվել է Գագիկ Ծառուկյանի՝ քաղաքականություն վերադառնալու հարցը եւ նրա վերադարձի մասին նախնական որոշում է կայացվել: Այդ մասին լրագրողներն այսօր հարցեր են ուղղել խորհրդարանական ուժերի ներկայացուցիչներին: Հավելենք, սակայն, որ Ծառուկյանի մամուլի խոսնակ Իվետա Տոնոյանը NEWS.am-ի հետ զրույցում հայտարարեց, որ ոչ մի ձեւաչափով հանդիպում չի եղել, լուրը չի համապատասխանում իրականությանը:
Այսօր Ազգային ժողով էր եկել նաեւ Արդարադատության նախարար Արփինե Հովհաննիսյանը՝ ներկայացնելու «Հասարակական կազմակերպությունների մասին» եւ կից օրենքների նախագծերի փաթեթը: Սակայն նախարարին երկար ժամանակ չի հաջողվել պատգամավորների ուշադրությունը կենտրոնացնել թեմայի ուղղությամբ: ՀՀԿ-ական պատգամավորներն անսպասելիորեն սկսել են խոսել Հայաստանում գեյ-շքերթների անթույլատրելիության մասին:
Դոլարի փոխարժեքը հոկտեմբերի 6-ին աճել է, եվրոյինը՝ նվազել: Դոլարի փոխարժեքն արդյունքում կազմել է 474 դրամ, եվրոյինը՝ 530, ռուբլունը՝ 7.61 դրամ, ֆունտինը՝ 603 դրամ:
Հոկտեմբերի 7-ին հանրապետության տարածքում սպասվում է առանց տեղումների եղանակ: Օդի ջերմաստիճանն էապես չի փոխվի: Երեւանում նույնպես վաղը տեղումներ չեն սպասվում:
