Տավուշի մարզում պայմանագրային զինծառայող է մահացել: Գնդացրորդ Իվան Դավիթի Հայրապետյանի դիակը հայտնաբերել են բերանի աջ ստորին եւ գլխի ձախ գագաթային հատվածներում միջանցիկ հրազենային վնասվածքներով: 23-ամյա Իվան Հայրապետյանը Տավուշի մարզի Նորաշեն համայնքից էր, ծառայության էր անցել 3-4 տարի առաջ: Համայնքի ղեկավար Գոռ Աբրահամյանն ասում է՝ «խելոք տղա էր, ինչքան հայտնի է՝ ծառայության ընթացքում ոչ մի խնդիր չի ունեցել»: Փաստի առիթով քրեական գործ է հարուցվել:
Ազգային ժողովն այսօր արտահերթ նիստ էր հրավիրել՝ քննարկելու, մասնավորապես, 2017 թվականի պետբյուջեի նախագիծը: ՀԱԿ-ից Արամ Մանուկյանը խոսել է պետական ապարատի ուռճացվածության մասին: Ասում է՝ պետական գերատեսչություններում աշխատակազմերը երեք եւ ավելի անգամով ավելացել են: Արդյունքում նաեւ այդ մարդկանց պահպանման ծախսերի ու աշխատավարձերի խնդիր է առաջ գալիս: Թվային պատկեր ներկայացնելով՝ Մանուկյանը վերջում Պոզներից մեջբերում է արել:
Միքայել Մելքումյանն էլ խոսել է բերքի մթերման խնդիրների, ստվերային տնտեսության, տնտեսական որոշում կայացնողների նկատմամբ հետադարձ պատասխանատվության մեխանիզմի կիրառման անհրաժեշտության մասին:
Նիկոլ Փաշինյանին էլ մտահոգում է այն, որ վերջին 10-12 տարում 6 կառավարություն է փոխվել, բայց տնտեսական մոդելը չի փոխվել: Ասում է՝ քանի դեռ Հայաստանում չկա արդյունաբերություն, տնտեսական զարգացում չի լինի: Պատգամավորը եւս մեկ անգամ ուշադրություն է հրավիրել ծառայողական մեքենաների առատության խնդրի վրա: Հաշվարկել է. ծառայողական ավտոմեքենաների վրա պետությունն ավելի շատ փող է ծախսում, քան սահմանամերձ գյուղերին է տալիս՝ շուրջ 200 մլն դրամ:
Արդարադատության նախարարից էլ լրագրողները հետաքրքրվել են ապօրինի հարստացածների համար պատիժ սահմանող օրինագծի մասին: Արփինե Հովհաննիսյանը պարզաբանել է, որ առաջարկվող նախագծով ապօրինի հարստացման համար քրեական պատասխանատվություն է նախատեսվում նաեւ պաշտոնյայի կնոջ, որդու համար: Նախարարը նաեւ վստահեցրել է. փախչելու տեղ չեն ունենա:
Արտահերթ նիստն այսօր ընդմիջվել է: Մինչեւ երկուշաբթի պատգամավորները, խմբակցություններն ու հանձնաժողովները ժամանակ ունեն՝ նախագծի շուրջ առաջարկներ ներկայացնելու համար։
Պետական տեսուչներին չպետք է որպես պատժողների ընկալել: Կառավարության այսօրվա նիստում այս մասին հայտարարել է վարչապետ Կարեն Կարապետյանը եւ տեսչական ստուգումներ կատարող գերատեսչություններին հանձնարարել վերանայել դրանց անցկացման պրակտիկան։ Ասում է՝ տեսուչը ոչ թե վերահսկիչ է, այլ օգնական։ Պետք է թերությունների վերացման կանխարգելիչ միջոցներ առաջարկել, եւ պատժել կարելի է միայն այն դեպքում, երբ կազմակերպությունը շարունակում է թերացումներ թույլ տալ:
Վարչապետի այսօրվա հանձնարարականներից մեկն էլ վերաբերել է իրանական շուկայում հայկական արտադրանքի ծավալների ավելացմանը: Կարեն Կարապետյանը հանձնարարել է նաեւ քննարկել Իրանի սահմանակից տարածքում ազատ տնտեսական գոտի հիմնելու հնարավորությունը: Հարկավոր է նաեւ աշխուժացնել ներդրումները: Կարեն Կարապետյանը ներդրումային ծրագրեր ունեցողներին կոչ է արել Տնտեսական զարգացման եւ ներդրումների նախարարություն դիմել: Իրավաբանական անձանց լիցենզիաները հարկավոր է տրամադրել բացառապես էլեկտրոնային եղանակով: Վարչապետը հանձնարարել է օրենսդրական փոփոխությունների փաթեթ մշակել: Բացառություն պետք է արվի միայն այն լիցենզիաների համար, որոնք պետական գաղտնիքի տարրեր են պարունակում:
«Նաիրիտ»-ի աշխատակիցներն այսօր անսպասելիորեն մտել են Էներգետիկ ենթակառուցվածքների եւ բնական պաշարների նախարարության շենք: Նախարարի հետ հանդիպում էին պահանջում: Աշոտ Մանուկյանը ստիպված է եղել դուրս գալ նաիրիտցիների դժգոհությունները լսելու: Հավաքի մասնակիցներն ասում են՝ շուրջ 261 աշխատակից արդեն 5-րդ ամիսն է՝ աշխատավարձ չի ստացել: Նաեւ վստահեցրին, որ ոչ մի կերպ չեն կարողանում նախարարին տեսնել: Աշոտ Մանուկյանը զարմացած էր. հնարավոր չէ: Գործարանի աշխատակիցները խնդրել են իրենց աշխատավարձերի վճարման հստակ ժամկետներ նշել: Աշոտ Մանուկյանը, սակայն, կառավարությունում հերթական քննարկումների մասին է նշել եւ խստացել ծանոթանալ նաիրիտցիների պահանջներին: Այս պատասխանը բարկացրել է նաիրիտցիներին:
Ողբերգական դեպք Երեւանում: Ագաթանգեղոս փողոցում միջին տարիքի տղամարդու դի է հայտնաբերվել: Իրավասու մարմինները փորձում են պարզել նրա ինքնությունն ու բնակության վայրը: Դատաբժշկի նախնական եզրակացության համաձայն՝ տղամարդը հանկարծամահ է եղել:
Շենգավիթի «Լիա» գեղեցկության սրահում տեղի ունեցած սպանության գործով երկու անձի մեղադրանք է առաջադրվել՝ Պետրոս Իսրայելյանին եւ Ռուբեն Խաչատրյանին: Բացի այդ, սպանության կասկածանքով այսօր բերման են ենթարկվել քրեական հեղինակություն Բանդուրյան եղբայրներից Ալիկը՝ «Քյավառցի Ալիկ» մականունով եւ Արմեն Գալստյանը՝ «Բդո» մականունով: Հիշեցնենք, որ նոյեմբերի 13-ին տեղի ունեցած հրաձգության հետեւանքով մահացել են 25-ամյա Գեւորգ Ավետիսյանը եւ 30-ամյա Մուշեղ Մուշեղյանը, իսկ տուժածներից Արամ Պետրոսյանը հիվանդանոցում է, նրա վիճակը ծայրահեղ ծանր է: Տեղեկությունների համաձայն՝ վիճաբանությունը ծագել է փողի պատճառով:
Նոյեմբերի 18-ին դոլարը շարունակել է ամրապնդել դիրքերը, եվրոն էժանացել է: Արդյունքում դոլարի փոխարժեքը կազմել է 479 դրամ, եվրոյինը՝ 508, ռուբլունը՝ 7 դրամ 36 լումա, ֆունտինը՝ 594 դրամ։
Նոյեմբերի 19-ին հանրապետության տարածքում սպասվում է առանց տեղումների եղանակ: Օդի ջերմաստիճանն աստիճանաբար կնվազի 4-5 աստիճանով: Երեւանում նույնպես վաղը տեղումներ չեն սպասվում:
