Արդեն երկու շաբաթ հայկական բեռնատարները Վերին Լարսում սպասում են, որ ճանապարհը բացվի: Մի կողմից բնության քմահաճույքը, մյուս կողմից նրանց օգնելու իշխանությունների անկարողությունը վարորդներին հասցրել է հուսահատության: Օրերս նրանց այցելած Տրանսպորտի նախարարին վարորդները բողոքել են. իրավիճակը շատ լուրջ է, իրենք հայտնվել են անմարդկային պայմաններում: Վահան Մարտիրոսյանը վստահեցրել է, որ ամեն ինչ արվում է մեքենաները շուտափույթ ձյան թակարդից դուրս բերելու համար, աշխատում են վրացական կողմի հետ: Դատելով նախորդ տարիների փորձից, սակայն, նախարարի համար հեշտ չի լինի խոստումը պահել:
Այսօր արդեն Երեւանում լրագրողներին Վահան Մարտիրոսյանն ասել է՝ Լարսում Հայաստանի քաղաքացիներին պատկանող մոտ 4 հարյուր բեռնատար է այս պահին կանգնած, իրենք ոչնչով չեն կարող օգնել, մեղավորը ձյունն է: Հայաստանի ճանապարհների վիճակն էլ մի բան չէ, նկատել են լրագրողները: Տրանսպորտի նախարարության պատմության մեջ առաջին անգամ նախարարը խոստովանել է՝ ձյուն մաքրող տեխնիկան բավարար չէ, չեն հասցնում մաքրել ճանապարհները: Այնուամենայնիվ, մարզային ճանապարհների աղետալի վիճակի համար նախարարը մեղադրում է նաեւ վարորդներին. շատերը մինչեւ հիմա ամառային անվադողերով են: Եթե նոււյնիսկ նախարարությունը Վերին Լարսի խնդիրը լուծելու գործում թերացել է, հույս կա, որ այսօրվանից արդեն գիշերը հանգիստ չեն քնի. Կարեն Կարապետյանը հանձնարարել է՝ ուշադիր եղեք:
Կարեն Կարապետյանը Կառավարության նիստը սկսել է արդեն ավանդական դարձած հանձնարարականներով: Վարչապետը նախարարությունների եւ մարզպետարանների աշխատանքից դժգոհ է՝ քաղաքացիների դիմումներին անդեմ եւ գրեթե ոչինչ չասող պատասխանների մշակույթին պետք է վերջ տալ, կասեցնել ապօրինի ջրօգտագործումը, դպրոցներում հայտնաբերված թերությունները վերացնել երկու շաբաթվա ընթացքում, ուսումնասիրել «Փոքր Մհեր» կրթահամալիրում ուսանողների բունտի իրական պատճառները եւ եռօրյա ժամկետում ներկայացնել արդյունքները:
Սա կարծես թե նորանշանակ նախարարների ոճն է. նախ ասում են, ապա հերքում, կամ հորդորում անլուրջ վերաբերվել իրենց ասածներին: Օրերս մշակույթի նախարարը հայտարարել էր, որ պատրաստ է գնել Լեւոն Տեր- Պետրոսյանի աճուրդի հանված զրահապատ «Մերսեդեսը»: Արդյոք միտքը դեռ չի փոխել, NEWS.am-ի հարցին Ամիրյանը պատասխանել է՝ լուրջ չէ:
Այսօր Գյումրիի օդանավակայանից առաջին չվերթն է իրականացրել ռուսական «Պոբեդա» ավիաընկերությունը: Ընդամենը 16 դոլարով տոմսեր ձեռք բերած շուրջ 200 ուղեւորներից 16-ը մնացել է օդանավակայանում: Վանաձորցիներն առավոտյան արթնացել էին եւ հայտնաբերել, որ ձյունը փակել է ճանապարհը, ձնամաքրող մեքենա են կանչել ու մի կերպ հասել Գյումրի, բայց ռուսական ընկերությունը նրանց թույլ չի տվել ինքնաթիռ բարձրանալ: Վանաձորցիներին փորձել է օգնել Գյումրիի քաղաքապետ Սամվել Բալասանյանը, տեղում զանգահարել է «Պոբեդա»-ի տնօրենին եւ խնդրել, որ ընդառաջի:Բալասանյանի զանգը չի օգնել, վանաձորցիները ձեռնունայն հեռացել են Գյումրիից:
Առատ ձյունը պատգամավորների մոտ միայն դրական էմոցիաներ է առաջացնում: Արտահերթ նիստի ամենաթեժ օրակարգի պայմաններում նրանք ժամանակ են գտել եւ Ազգային ժողովի բակ են իջել՝ ձնագնդի խաղալու եւ ձյան մեջ թավալվելու:
Այդ ընթացքում նիստերի դահլիճում կարեւոր նախագծեր էին քննարկվում եւ մեկը մյուսի հետեւից դրվում քվեարկության: «Կուսակցությունների մասին» օրենքի նախագծի քվեարկության ժամանակ Առաքել Մովսիսյանը, նույն ինքը՝ «Շմայսը», քվեարկեց իր կողքին նստող Ռուբեն Սադոյանի փոխարեն: Սա չվրիպեց Թեւան Պողոսյանի աչքից. աթոռը դատարկ է, կոճակը՝ կանաչ: Նրա պահանջով Գալուստ Սահակյանը Սադոյանի «այո»-ն չհաշվեց, Առաքել Մովսիսյանն էլ Թեւան Պողոսյանին «գործ տվող» անվանեց:
Գործ տալու անհրաժեշտություն շուտով Ազգային ժողովում չի լինի: ՀՀԿ-ական եւ Դաշնակցական պատգամավորների առաջարկած նոր Կանոնակարգ- օրենքով պատգամավորները հնարավարություն կունենան քվեարկությանը մասնակցել, նույնիսկ երբ Ազգային ժողովում չեն՝ պատճառաբանելով, որ գործուղման մեջ են եւ իրենց քվեարկելու իրավունքը գրավոր փակ ծրարով հանձնելով քարտուղարությանը: Օրենքի նախագիծն արդեն հաղթահարել է առաջին ընթերցման քննությունը եւ հավանաբար, վաղը երկրորդ ընթերցմամբ կդրվի քվեարկության:
Ազգային ժողովն այսօր վերջնականապես ընդունեց «1000 դրամների» նախագիծը: Օրենքն ուժի մեջ կմտնի հունվարի 29-ից, ամեն ամիս Հայաստանի բոլոր աշխատող քաղաքացիներն իրենց աշխատավարձից 1000 դրամ կհատկացնեն մարտական գործողություններում վիրավորված կամ զոհված զինծառայողների ֆոնդին: Նվազագույն աշխատավարձ ստացողների փոխարեն կվճարեն գործատուները, իսկ զոհված կամ հաշմանդամություն ձեռք բերած զինծառայողների ընտանիքները չեն վճարի:
Գագիկ Ծառուկյանը հայտնվել է դիվանագիտական սկանդալում: Նա Գյումրի է այցելել Բելառուսի դեսպանատան դիվանագիտական համարանիշով: «Range Rover»-ի տարօրինակ պետհամարանիշը լրագրողների աչքից չէր վրիպել: Փաստորեն, Ծառուկյանն իր թանկարժեք ավտոմեքենան ներմուծելիս չի մաքսազերծել՝ խնայելով մի քանի հազար դոլար: Հաշվի առնելով Ծառուկյանի բարեկամական հարաբերությունները Լուկաշենկոյի հետ՝ գործարար պատգամավորի համար դիվանագիտական պետհամարանիշ ստանալը խնդիր չի եղել: Ծառուկյանն այսօր ստիպված է եղել հրապարակավ ներողություն խնդրել Բելառուսի դեսպանատնից՝ նրանց դիվանագիտական սկանդալի մեջ ներքաշելու համար: Ընդ որում, Ծառուկյանը պնդում է՝ Range Rover-ն իրենը չէ, դեսպանատան մեքենան է:
Նոր Նորքի «Սուրբ Սարգիս» եկեղեցում տեղի է ունեցել Արտակարգ իրավիճակների նախկին նախարար Արմեն Երիցյանի հոգեհանգիստը: Արարողությանը մասնակցել է բարձրաստիճան պաշտոնյաներ, պատգամավորներ, մեծ թվով քաղաքացիներ:
ՊՊԾ գնդի գրավումից հետո Խորենացի փողոցում սպանված ոստիկանության երկու ծառայողների ընտանիքները նոր բնակարաններ կստանան: Յուրի Տեփանոսյանի եւ Գագիկ Մկրտչյանի ընտանիքներին Երեւանի քաղաքապետարանը նոր բնակարանների բանալիները կհանձնի դեկտեմբերի 21-ին:
Լեոնարդո դի Կապրիոն խոշոր գումար է նվիրաբերել «Հայաստանի մանուկներ» հիմնադրամին: Նա 65 հազար դոլարով գնել է Ջո Բրադլիի՝ աճուրդի հանված նկարը, որի գումարն ամբողջությամբ ուղղվել է հայ գիտնական Կարո Արմենի ստեղծած հիմնադրամին: Այն օգնում է Հայաստանի գյուղերում բնակվող կարիքավոր երեխաներին: Ավելի վաղ հիմնադրամին աջակցել էր նաեւ հոլիվուդյան մեկ այլ մեգաաստղ Թոմ Հենքսը:
Հիմնական բոլոր տարադրամների փոխարժեքներն այսօր նվազել են: Դոլարը 485 դրամ է, եվրոն՝ 509-ը, ֆունտը՝ 607, իսկ ռուբլին՝ 7,88 դրամ:
Հայաստանում սաստիկ սառնամանիքներ են սպասվում: Օդի ջերմաստիճանը դեկտեմբերի 16-ից 19-ը կտրուկ կնվազի, ամենաշատը Վայոց ձորում եւ Լոռիում՝ մինչեւ -30 աստիճան: Երեւանում վաղը հնարավոր է՝ թույլ ձյուն, գիշերը ջերմաստիճանը կնվազի մինչեւ -8, ցերեկը՝ -5: