Փետրվարի 1-ին ադրբեջանական կողմը հերթական դիվերսիոն ներթափանցման փորձն է ձեռնարկել Թալիշի ուղղությամբ: Պաշտպանության բանակի ուժերին հաջողվել է կասեցնել դիվերսիան եւ գերեվարել դիվերսիոն խմբի անդամներից մեկին` 22-ամյա Էլնուր Հուսեյինզադեին: Ադրբեջանի պաշտպանության նախարարությունը շտապել է հրաժարվել իր զինծառայողից. տարածել է հայտարարություն`իբր Էլնուրը անկարգապահ զինծառայող է եղել, իսկ հիմա զորացրված է եւ չի ծառայում Ադրբեջանի զինված ոժերում: Ավելի ուշ, սակայն, համացանցում տարածվեց տեսանյութ, որում Էլնուրի հարազատները պատմում էին, որ ծառայությունն ավարտելուց չորս ամիս անց իրենց որդուն կրկին շտապ ծառայության են կանչել զինված ուժեր:

Պաշտոնական Ստեփանակերտը հայտարարել է, որ գերու վիճակը նորմալ է, նա կատարյալ անվտանգության մեջ է, ավելի ապահով, քան իր հայրենիքում, որի իշխանությունները փաստացի նրանից հրաժարվել են: Ի դեպ, սա Բաքվի ձեռագիրն է. ամեն անգամ, երբ շփման գիծը խախտող որեւէ զինծառայող հայտնվում է հայկական կողմի ձեռքում, Ադրբեջանը նախ նրանց դասալիք է դարձնում, ապա անպայման հայտարարում, որ նրանք զինված ուժերի հետ որեւէ կապ չունեն: Սա առնվազն ծիծաղելի է, քանի որ զինծառայողը, որը ներկայացվում է որպես զորացրված, եղել է զինվորական համազգեստով եւ զինված: Հայ քաղաքագետները կարծում են, որ ստեղծված իրավիճակում շփման գծում նոր էսկալացիան լիովին հավանական է. պատճառը Ադրբեջանի ներքաղաքական ու սոցիալական ծանր վիճակն է: Ադրբեջանական մանաթը շարունակում է արժեզրկվել եւ չի բացառվում, որ Ալիեւը հերթական արկածախնդրության գնա` այդ խնդիրներից հասարակությանը շեղելու նպատակով:

Հովիկ Աբրահամյանի հեռանալուց հետո Արարատի մարզը Հանրապետականի համար խնդիր է դարձել. նախկին վարչապետի ազդեցությունն այս մարզում մեծ է եւ նախկինում Հանրապետականի համար հենց Հովիկ Աբրահամյանն էր ապահովում ձայներն այս մարզից: Ո՞վ կարող է հակակշիռ դառնալ նախկին վարչապետին, մինչեւ երեկ քննարկվում էր երկու անուն` նախկին ոստիկանապետ Ալիկ Սարգսյանը եւ բնապահպանության նախկին նախարար Արամայիս Գրիգորյանը: Երկուսն էլ ծնունդով Արարատից են եւ ունեն ազդեցության լծակներ: Այսօր առավոտյան պարզ դարձավ, որ Հանրապետականը որոշել է մարզի կուռացիան երկուսի ուսերին դնել. Արամայիս Գրիգորյանը կզբաղվի վարչական հարցերով, Ալիկ Սարգսյանը` քաղաքական. նա ղեկավարելու է Արարատում ՀՀԿ տարածքային կառույցը: Արամայիս Գրիգորյանն այսօր արդեն կառավարություն էր եկել, մարզպետի պաշտոնում նրա աշխատանքային առաջին օրն էր: Նիստից հետո լրագրողները նորանշանակ մարզպետից հետաքրքրվեցին՝ արդյոք իր նշանակումը Հովիկ Աբրահամյանի ազդեցությունը թուլացնելու նպատակ ունի, եւ արդյոք հնարավոր է, որ առաջիկա ընտրություններին բախում լինի երկու թիմերի միջեւ: Մարզպետը, իհարկե, հերքեց այս տեղեկությունը, ավելին` վստահեցրեց, որ իր նշանակումը քաղաքական չէ:

ԿԸՀ-ում դեռ առաջադրումները չեն սկսվել, բայց  Շիրակի մարզում առաջին փոխհրաձգությունն է հնչել վաղեմի հակառակորդներ Վարդան Ղուկասյանի եւ Մարտուն Գրիգորյանի միջեւ՝ առայժմ դեռ վիրտուալ տիրույթում: ՀՀԿ տարածքային ցուցակով առաջադրվող Մարտուն Գրիգորյանը «Ֆեյսբուքում» երկարաշունչ գրառում է  արել, որում պատմել է նախ այն մասին, թե որքան է հարգում Գագիկ Ծառուկյանին, ապա նշել, որ իր համար անսպասելի է եղել Վարդան Ղուկասյանին «Ծառուկյան դաշինքի» տարածքային ցուցակով առաջադրելու որոշումը: Անդրադառնալով  Վարդան Ղուկասյանի պաշտոնավարման տարիներին` Մարտուն Գրիգորյանն ասել է, որ այդ տարիներին քաղաքում տիրում էր «ամենաթողություն եւ թայֆայաբազություն», եւ դրանով է բացատրել, թե ինչու է ՀՀԿ-ն գերադասել իր նախկին կուսակցությանը` ԲՀԿ-ին:

Վարդան Ղուկասյանն այս գրառմանը պատասխանել է իր ոճով եւ NEWS.am-ի հետ զրույցում ակնարկել, որ Մարտուն Գրիգորյանին պակասում է խելքն ու շնորհքը:

Վարչապետ Կարեն Կարապետյանը կառավարության նիստը սկսել է ավանդական հանձնարարականներով` բիզնեսի համար պետք է բարենպաստ միջավայր ապահովել, ավելի խիստ լինել ապօրինություններ թույլ տվողների հետ, իսկ օրինապահների գործին հնարավորինս քիչ միջամտել: Նախորդ նիստին վարչապետը հանձնարարել էր պետական ընկերությունների կառավարիչներին թափ տալ` ով արդյունավետ չի աշխատում հեռացնել: Վարչապետին այսօր զեկուցեցին` 3 տնօրենի արդեն առաջարկել են դիմում գրել: Վարչապետի հանձնարարականները չկատարելու համար այսօր նկատողություն ստացավ սպորտի նախարարը. Կարեն Կարապետյանը հանձնարարել էր քաղաքացիների շրջանում առողջ ապրելակերպ քարոզել, բայց փոփոխություն չի տեսնում։ Հրաչյա Ռոստոմյանն արդարացավ` ձմեռ է, բոլորը ներս են քաշվել. Կարեն Կարապետյանը արձագանքեց ժպիտով եւ նկատողություն արեց։

Նախօրեին Կոտայքի մարզ այցելության ժամանակ վարչապետը Աբովյանի եւ Ծաղկաձորի քաղաքապետերի առջեւ երկու խիստ ամբիցիոզ առաջադրանք է դրել. առաջինը` տեխնոլոգիական, երկրորդը` հոգեւոր:

ՊՊԾ գնդի գրավման օրերին Խորենացի փողոցում ոստիկանության եւ ցուցարարների միջեւ բախումների ժամանակ ձերբակալաված, ապա ոստիկանների նկատմամբ բռնություն գործադրելու մեղադրանքով կալանավորված 3 ակտիվիստներ դատապարտվել են երեքական տարվա ազատազրկման: Արսեն Մկրտումյանը, Գագիկ Միքայելյանը եւ Սոս Մարգարայնը մեղադրվում էին հուլիսի 17-ին զանգվածային անկարգություններ հրահրելու եւ ոստիկանության աշխատակիցների ուղղությամբ քարեր նետելու մեջ: Նրանք իրենց առաջադրված մեղադրանքն ընդունել են:

Վրաստանի քաղաքացիները շուտով շենգեն գոտու երկրներ կմեկնեն առանց վիզայի: Եվրախորհրդարանն այսօր քվերակել է այդ երկրի հետ վիզաները չեղյալ հայտարարելու օգտին:

Պարզվում է` Երեւանի քաղաքապետարանը փողոցները ձնից չի կարողանում մաքրել ճամփեզրին կայանած մեքենաների պատճառով: Քաղաքապետարանն այսօր վարորդներին հորդորել է հնարավորին արագ հեռացնել երկար ժամանակ կայանած մեքենաները: Քաղաքապետարանին, որը պնդում է, թե լիարժեք իրականացնում է ձնամաքրման աշխատանքերը, չէր խանգարի լսել, թե ինչ են մտածում Երեւանի քաղաքացիներն այդ մասին:

Ի դեպ քաղաքացիներին մտահոգել է առաջիկա ամսվա եղանակի կանխատեսումը, ըստ որի` փետրվարին լինելու են սառնամանիքներ եւ առատ տեղումներ:

Դոլարն էժանացել է, եվրոն եւ ռուբլին` թանկացել: Փետրվարի 2-ին դոլարի փոխարժեքը կազմել է 485, եվրոյինը` 525, ռուբլունը` 8.15 դրամ, բրիտանական ֆունտը թանկացել է` կազմելով 616 դրամ:

Փետրվարի 3-ին հանրապետությունում սպասվում է  առանց տեղումների եղանակ. 2-ի լույս 3-ի գիշերը օդի ջերմատիճանը կնվազի 10-15 աստիճանով, մայրաքաղաքում գիշերը կդիտվի մինչեւ -25, ցերեկը՝ մինչեւ -7 աստիճան ցուրտ: