Գորիսի ոստիկանապետ Գեւորգ Ազիզյանն իր աշխատասենյակում այլ ոստիկանների հետ միասին ծեծի է ենթարկել Սյունիքի նախկին մարզպետ Սուրիկ Խաչատրյանի եղբոր՝ Սեյրան Խաչատրյանի որդուն՝ Էդմոն Խաչատրյանին:
Ոստիկանության մամուլի ծառայությունից NEWS.am-ին հայտնեցին, որ Գորիսի ոստիկանությունում տեղի ունեցած ծեծկռտուքի վերաբերյալ ահազանգ կա եւ ոստիկանության ներքին անվտանգության վարչությունում ստուգումներ են կատարվում:
Դեպքը տեղի է ունեցել փետրվարի 27-ին, ոստիկանապետի աշխատասենյակում: Երիտասարդին ծեծի ենթարկելու պատճառը, ըստ որոշ տվյալների, եղել է ոստիկանությունում աշխատող կին լեյտենանտներից մեկին հաղորդագրություն ուղարկելը:
Էդմոն Խաչատրյանին տեղափոխել են Գորիսի բժշկական կենտրոն: Գորիսի ԲԿ-ից NEWS.am-ին հայտնեցին, որ Էդմոն Խաչատրյանը տեղափոխվել է իրենց մոտ եւ այս պահին բուժում է ստանում:
Ավելի վաղ Գորիսի ոստիկանապետի մասնակցությամբ մեկ այլ միջադեպ էր տեղի ունեցել, նա ծեծի էր ենթարկել իր տեղակալի եղբորը՝ Արթուր Գեւորգյանին: Մամուլում տեսանյութ էր հայտնվել, որտեղ երեւում էր, թե ինչպես է Գորիսի ոստիկանապետ Գեւորգ Ազիզյանը ծեծում մի քաղաքացու: Պարզվել էր, որ միջադեպը տեղի էր ունեցել 2016թ. մարտի 8-ին՝ ժամը 22:15-ի սահմանում, Գորիսում գտնվող «Դիանա» հյուրանոցային համալիրին հարող տարածքում, ծեծվել էր ոստիկանապետի տեղակալի եղբայրը՝ Արթուր Գեւորգյանը: Տուժած Արթուր Գեւորգյանը հետագայում ներգրավվել էր գործում որպես մեղադրյալ ոստիկանի նկատմամբ բռնություն գործադրելու մեղադրանքով, նա կալանավորվել էր, ապա ազատ արձակվել: Գործը քննչական կոմիտեից տեղափոխվել էր ՀՔԾ, որոշ ժամանակ անց կարճվել՝ հանցակազմի բացակայության հիմքով: