Մարտական դիրքում ինժեներական աշխատանքներ կատարելիս պայթյունի հետևանքով տարբեր աստիճանի բեկորային մարմնական վնասվածքներ ստացած պարտադիր ժամկետային զինծառայողներից Էրիկ Սահակյանի վնասվածքները թեթեւ են, նա գտնվում է Վանաձորի հիվանդանոցում։ Այս մասին NEWS.am-ի հետ զրույցում այսօր՝ մարտի 4-ին, ասել է պաշտպանության նախարարի մամուլի խոսնակ Արծրուն Հովհաննիսյանը:
Ըստ նրա՝ Պերճ Գաբրիելյանի առողջական վիճակը միջին ծանրության է։
Վիրավոր զինծառայողներից Նարեկ Գրիգորյանի վիճակը գնահատվում է ծայրահեղ ծանր։ Նա Երեւանի Կենտրոնական հոսպիտալում է։ Ըստ ՊՆ խոսնակի՝ Նարեկի մոտ նկատվում է դրական միտում։
Ավելի վաղ NEWS.am-ը հայտնել էր, որ փետրվարի 28-ին մարտական դիրքերում ինժեներական աշխատանքներ կատարելիս պայթուցիկ սարքի պայթյունից զինծառայողներ են վիրավորվել:
Պարտադիր ժամկետային զինծառայողները ստացել են տարբեր աստիճանի բեկորային մարմնական վնասվածքներ եւ տեղափոխվել ՀՀ ՊՆ Կենտրոնական կլինիկական զինվորական հոսպիտալ:
Քննչական կոմիտեի 6-րդ կայազորային քննչական բաժնում հարուցվել է քրեական գործ 376-րդ հոդվածի 2-րդ մասով՝ անփույթ վերաբերմունք ծառայության նկատմամբ:
