Հայաստանի Մարդու իրավունքների պաշտպանի գրասենյակը բռնություն կիրառելու մասին հաղորդում է ստացել։ Այս մասին հունիսի 29-ին կառավարության նիստից հետո լրագրողների հետ զրույցում հայտարարեց ՀՀ ՄԻՊ Արման Թաթոյանը՝ խոսելով «Սասնա ծռեր»-ի բանտարկված մի քանի անդամների ծեծի ենթարկելու մասին։ Նրա խոսքով՝ այդ հաղորդումների հիման վրա երեկ գիշերվանից ՄԻՊ-ի գրասենյակի աշխատակիցները համապատասխան այցեր են կատարում։
Հիշեցնենք, որ «Սասնա ծռեր» խմբավորման անդամ Արայիկ Խանդոյանի փաստաբանը պնդում է, որ իր պաշտպանյալը դաժան կտտանքների է ենթարկվել։ Փաստաբանը հայտարարել է, որ իր պաշտպանյալը ծեծի է ենթարկվել մայրաքաղաքի Ավան եւ Նոր նորք շրջանների ընդհանուր իրավասության դատարանի նկուղում։ Նրա պնդմամբ՝ 15 մարդ հերթով Խանդոյանին ծեծի է ենթարկել։ Պատճառը Խանդոյանի՝ «Ի՞նչ է պատահել» անմեղ հարցն է, երբ դատարանի դահլիճից ուժով հեռացրել են Արեգ Կյուրեղյանին ու Մխիթար Ավետիսյանին։ Արայիկ Պապիկյանի խոսքով՝ իր պաշտպանյալը ուղեղի ցնցում է ստացել, վնասվել են երիկամներն ու ոտքերը։ Փաստաբանը պնդում է նաեւ, որ ծեծի են ենթարկվել Սմբատ Բարսեղյանն ու Գագիկ Եղիազարյանը։