Մոսկվայի քրեական հետախուզությունը ձերբակալել է քրեական աշխարհի 2 կորիֆեյների։ Երկու ձերբակալվածները միասին 152 տարեկան են։ Առաջինը 70-ամյա «օրենքով գող» Նուգզար Ախվլեդիանին է, որը քրեական աշխարհում հայտնի է որպես Չիպա։ Նրան ձերբակալել են ՃՈ տեսուչին կաշառք տալու համար։ Երկրորդը նախկին «օրենքով գող» Վիլյամս Ամիրխանյանն է՝ հայտնի որպես Վիլիկ։ Նրան  ձերբակալել են գրպանահատության համար, փոխանցում է «Պրայմ Քրայմը»։

70-ամյա Նուգզար Ախվլեդիանին այսօր ամենատարեց «օրենքով գող» վրացին է, որն ապրում է Մոսկվայում։ Վրացու խոսքով՝ ինքը մեկ անգամ դատվել է Մոսկվայում 1977-ին եւ 5 տարով ազատազրկվել։ Դրանից հետո Չիպան ստվերում էր եւ ճաղերի հետեւում չէր հայտնվել։

Անցյալ երկուշաբթի «օրենքով գողին» կանգնեցրել էին ՃՈ աշխատակիցները կարմիր լույսի տակով անցնելու համար։ Նա փորձել է գլուխն ազատել տեսուչին 1000 ռուբլի կաշառք տալով, սակայն նրան ձերբակալել են։ Այս պահին նա ստորագրությամբ ազատ է արձակվել։

Մյուս ձերբակալվածը 82-ամյա Վիլյամս Ամիրխանյանն է, որն իր «գողական» կոչումը կորցրել էր դեռ 1980-ականներին։ Ի տարբերություն Չիպայի՝ նա զբաղվում է գրպանահատությամբ, ինչի պատճառով ամեն 10 տարին մեկ բանտում է հայտնվում։ Այս անգամ նա բռնվել է Սբերբանկի «Կրիլատսկոե» մասնաճյուղում այցելուներից մեկի պայուսակից գողություն կատարելիս։ Նրա գողոնը խնայողական գրքույկն է եւ 20 հազար ռուբլի կանխիկ գումարը։ Ամիրխանյանին կալանքի տակ են վերցրել։