Ժամանակն է ճանաչել Երուսաղեմը որպես Իսրայելի մայրաքաղաք: Այս մասին հայտարարել է ԱՄՆ նախագահ Դոնալդ Թրամփը: Նա նշել է, որ մի քանի տասնամյակ ամերիկացի նախագահները հետաձգել են Երուսաղեմը ճանաչելու որոշումը:
«70 տարի առաջ Միացյալ Նահանգները ճանաչել է Իսրայել պետությունը, սակայն մենք դեռեւս չենք ճանաչել Երուսաղեմը որպես մայրաքաղաք: Ըստ էության Իսրայելի որեւէ մայրաքաղաք չենք ճանաչել», - ասել է Թրամփը` հավելելով, որ այսօրվա որոշումը ոչ այլ ինչ է, քան իրականության ճանաչում:
Ըստ Թրամփի՝ ինքը որոշել է անել այն, ինչ շատ ամերիկացի նախագահներ խոստացել են՝ ելնելով քաղաքական նկատառումներից եւ փխրուն խաղաղությունը խախտելու մտավախություններից: «Ես որոշեցի, որ ժամանակն է պաշտոնապես ճանաչել Երուսաղեմը որպես Իսրայելի մայրաքաղաք», - ասել է Թրամփը:
Թրամփը նշել է, որ որոշումը ամուր խաղաղության պայմանագրի հասնելու հեռացում չէ:
«Մենք ցանկանում ենք լավ գործարքի հասնել ինչպես իսրայելցիների, այնպես էլ պաղեստինցիների համար: Մենք վերջնական կարգավիճակի հարցով որեւէ դիրքորոշում չենք ընդունում, ներառյալ Երուսաղեմում Իսրայելի ինքնիշխանության կոնկրետ սահմանները կամ վիճելի սահմանները լուծելու հարցը: Այս հարցերը վերաբերում են ներգրավված կողմերին: Միացյալ Նահանգները շարունակում են խորապես հավատարիմ մնալ խաղաղության համաձայնագրին, որը ընդունելի է երկու կողմերի համար »:
Թրամփը նաեւ նշել է, որ շատերը համաձայն չեն լինի իր որոշման հետ, բայց իմաստություն եւ զսպվածություն ցուցաբերելու կոչ է արել: «Իհարկե, այս հայտարարության վերաբերյալ տարաձայնություններ եւ անհամաձայնություններ կլինեն, բայց մենք համոզված ենք, որ ի վերջո, մենք կհաղթահարենք ենք այդ տարաձայնությունները եւ ավելի խորը փոխըմբռնման եւ համագործակցության կհասնենք»:
