ԱՄՆ նախագահ Դոնալդ Թրամփը «ճիշտ եւ համարձակ» քայլ է կատարել՝ ճանաչելով Երուսաղեմը որպես Իսրայելի մայրաքաղաք, սակայն Իսրայելն ու պաղեստինցիները պետք է վերջնական որոշում կայացնեն նրա կարգավիճակի եւ սահմանագծման վերաբերյալ: Այդ մասին հայտարարել է ՄԱԿ-ում ԱՄՆ մշտական ներկայացուցիչ Նիկի Հեյլին, հաղորդում է CBS-ը:
«Դա ճիշտ քայլ է, քանի որ դա իրականություն է: Երուսաղեմը Իսրայելի մայրաքաղաքն է», - ասել է նա:
Դիվանագետի խոսքով՝ «խաղաղությունը կահաստատվի, երբ երկու կողմերը ճանաչեն իրերի իրական դասավորությունը»:
Մշտական ներկայացուցիչը հավաստիացրել է, որ Վաշինգթոնը կաջակցի խաղաղ գործընթացին:
Հեյլին նաեւ ասել է, որ անհանգստացած չէ Թրամփի որոշման քննադատություններից: «Ամեն անգամ երբ պետք է խիզախ քայլեր անեք, գնաք ստատուս քվոյի դեմ, կլինեն մարդիկ, ովքեր կասեն, որ երկինքը ընկնում է: Բայց դա այդպես չէ », - ասել է նա:
Արդեն CNN-ին տված հարցազրույցում մշտական ներկայացուցիչը նաեւ անհամաձայնություն է հայտնել այն փաստի հետ, որ Թրամփի գործողությունները բացասական ազդեցություն կունենան արաբական աշխարհում: