Վաշինգթոնում բնակվող փաստաբանը դատի է տվել ԱՄՆ նախագահի դստերը՝ Իվանկա Թրամփին եւ նրա ամուսնուն՝ Ջարեդ Քուշներին, որոնք հանդիսանում են նախագահի խորհրդականները, մեղադրելով նրանց եկամուտները թաքցնելու մեջ: Այս մասին հաղորդում է Politico-ն:
Հայցի համաձայն՝ ամուսինները հռչակագրում չեն ներառել 30 ներդրումային ֆոնդերի ակտիվների մասին տեղեկությունը, որոնց բաժնետոմսերի սեփականատերերն են հանդիսանում: Հայցի մեջ նշված է, որ որոշ դեպքերում Քուշները հրաժարվել է տրամադրել տվյալներ «գոյություն ունեցող գաղտնիության համաձայնագրի» պատճառով, որը, փաստաբանի կարծիքով, հակասում է 1978 թ․ ընդունված ԱՄՆ քաղաքացիական ծառայողների էթիկայի օրենքին:
«Հայցը նպատակ ունի պարտադրել պատասխանող կողմին փոխել եկամուտների հայտարարագիրը եւ բացահայտել այդ ֆոնդերից ստացվող միջոցները, ինչպես նաեւ ունեցած ֆինանսական շահերը», - նշված է փաստաթղթում, հաղորդում է «ՌԻԱ Նովոստի»-ն: