Երեւանի ընդհանուր իրավասության դատարանի Ավան եւ Նոր Նորքի նստավայրում «Սասնա ծռերի» գործով դատական նիստն այսօր՝ մարտի 1-ին, հետաձգվեց «Սասնա ծռերին» աջակցելու մեջ մեղադրվող Կարո Եղնուկյանի վատառողջ լինելու մասին։ Այս մասին NEWS.am-ի հետ զրույցում ասաց հանրային պաշտպան Անուշ Մխիթարյանը։
«Կարո Եղնուկյանի ճնշումն էր բարձրացել, այդ պատճառով դատավորը որոշեց դատական նիստը հետաձգել, քանի որ Եղնուկյանը այդ վիճակով չէր կարող մասնակցել նիստին»,- նշեց պաշտպանը։
Հիշեցնենք, որ նախորդ դատական նիստին դատավոր Արտուշ Գաբրիելյանը «Սասնա ծռերի» բոլոր անդամների նկատմամբ սանկցիա էր կիրառել եւ հեռացրել էր դատական նիստերի դահլիճից։
Նշենք, որ Արտուշ Գաբրիելյանը քննում է «Սասնա ծռեր» խմբի անդամներ Արմեն Լամբարյանի, Աշոտ Պետրոսյանի, Արթուր Մելքոնյանի, Տիգրան Սարգսյանի, Արթուր Սողոմոնյանի, Գառնիկ Հովակիմյանի, Հովհաննես Վարդանյանի, Մանվել Աթոյանի, Վարդգես Գեւորգյանի, Կարո Եղնուկյանի և Խաչատուր Գիչյանի առանձնացված մասով գործը:
