Արագածոտնում այսօր լարված իրավիճակ էր: Մարզի Օհանավան համայնքի բնակիչները փակել էին Երեւան-Վանաձոր ճանապարհը: Նշում են, որ արդեն 11 օր է՝ մրգով բեռնված շուրջ 20 մեքենաներ կանգնած են Վերին Լարսի անցակետում, իսկ ռուսական կողմը թույլ չի տալիս հատել սահմանը: Ասել են՝ խնձորը թուրքական ծագում ունի եւ Ռուսաստան արտահանել հնարավոր չէ: Բեռնատարները Հայաստանի սահման հասցնելը նույնպես խնդիր է. Կազբեգիում առատ ձյուն է տեղացել եւ Վերին Լարսի ճանապարհը փակ է: Ի վերջո, գյուղացիները բացել են ճանապարհն ու գնացել Արագածոտնի մարզպետարան՝ քննարկման: Մարզպետը խոստացել է հնարավորինս արագ լուծում գտնել խնդրին: Աշոտ Սիմոնյանը, սակայն, պնդում է, որ ստեղծված իրավիճակում մեղքի մեծ բաժին ունեն հենց արտահանողները:
Մարզպետը վստահեցնում է, որ պահանջները նոր չեն, պարզապես արտահանողները նախկինում կարողացել են ինչ-ինչ ճանապարհներով տեղում հարթել թերությունները, բայց հիմա կարգը խստացվել է: Ռուսական կողմը տեղեկացրել է, որ խնդիրը ձեւաթղթերի եւ կարգի պահպանման մեջ է, եւ ռուսական շուկա հայկական մրգի արտահանման հետ կապված ոչ մի խնդիր չկա: Գյուղացիները մտահոգություն ունեն, որ այդ ընթացքում միրգը կարող է փչանալ, բայց փոխհատուցման մասին խոսելը մարզպետը վաղ է համարում: Ամեն դեպքում, Աշոտ Սիմոնյանը տրամաբանական չի համարում փոխհատուցման ակնկալիքները, քանի որ խնդիրը ծագել է արտահանողների մեղքով:
Խորհրդարանը շարունակում է արտահերթ նիստեր գումարել՝ Սահմադրության փոփոխություններով պայմանավորված օրենսդրական կարգավորումներն ավարտին հասցնելու համար: Այսօր մեկնարկած արտահերթում 12 հարց է ներառված: Պատգամավորները քննարկել են կառավարության կառուցվածքին վերաբերող օրենսդրական փաթեթը: Այն նախատեսում է, որ ապրիլից կունենանք վարչապետ, առաջին փոխվարչապետ, եւս երկու փոխվարչապետ եւ 17 նախարար: Նշենք, որ ներկայում 18 նախարարություն ունենք, իսկ նոր կառավարության կազմում Միջազգային ինտեգրման եւ բարեփոխումների նախարարություն չի լինի: Այս փոփոխության պատճառի մասին հարցին Դավիթ Հարությունյանն այդպես էլ հստակ պատասխան չի տվել: Պատգամավորները կրկին մտահոգություն են հնչեցրել նաեւ կառավարության նիստերը դռնփակ անցկացնելու հարցի շուրջ: Արդարադատության նախարարը կրկին պնդել է, որ դա չի հակասում ժողովրդավարության սկզբունքներին:
Ինչ վերաբերում է Անվտանգության խորհրդի կազմին. «Ելք»-ը դեմ է, որ Խորհրդի կազմից հանվեն Հայաստանի նախագահն ու Ազգային ժողովի նախագահը: Արարատ Միրզոյանն էլ հեգնել է՝ խորհրդի կազմի մասին սեփական առաջարկը ներկայացնելով: Արտահերթ նիստի օրակարգում ներառված հարցերն այսօր չեն սպառվել: Ազգային ժողովը նիստ կանցկացնի նաեւ վաղը:
Ապրիլի 2-ը ոչ աշխատանքային կլինի: Որոշումն ընդունվել է կառավարության այսօրվա նիստում: Ապրիլի 1-ին Հայ առաքելական եկեղեցին նշելու է Սուրբ Հարության տոնը, իսկ տաղավար տոների հաջորդ օրը, այս դեպքում՝ ապրիլի 2-ին, մեռելոց է: Փոխարենն աշխատանքային կլինի ապրիլի 7-ը:
Գործադիրի այսօրվա նիստից ուշագրավ է, մասնավորապես, դեղերը դեղատոմսով բաց թողնելու մասին կարգը: Մարտի 1-ից այն ուժի մեջ է մտել մասնակի, թեեւ այն ամբողջական ներդնելու մասին կառավարության որոշում կար: Այսօր առողջապահության փոխնախարարը ներկայացրել է դեղատոմսերի ներդրման փուլային տարբերակի ժամանակացույցը: Ի դեպ՝ նախապես հրապարակված ցանկում մարտի 1-ից պարտադիր դեղատոմսով բաց թողնելու ենթակա էին նաեւ հորմոնային դեղամիջոցները, բայց հիմա որոշվել է, որ մինչեւ հոկտեմբերի 1-ը դրանք ազատ վաճառքում կլինեն: Փոփոխության պատճառը որեւէ կերպ չի մեկնաբանվում: Իսկ մինչ այդ, վարչապետը կոչ է անում ուշադիր լինել դեղատոմսերի խնդրին: Արդեն անհանգստացնող ինֆորմացիա են ստացել:
Հիշեցնենք, որ կառավարության նախորդ՝ մարտի 1-ի նիստից հետո նախարար Լեւոն Ալթունյանը լրագրողներին ասել էր, որ դեղատոմսերը ներդնելու են փուլային տարբերակով, իսկ կարգն ընդունվելու է գործադիրի հաջորդ նիստում: Բայց փուլային տարբերակով դեղերը սկսել են բաց թողնել հենց մարտի 1-ից: Ստացվում է, որ կառավարությունը հաստատել է մի բան, իսկ առողջապահության նախարարությունն այլ կարգ է որոշել, եւ չսպասելով գործադիրի որոշմանը՝ այն ուժի մեջ դրել: Շատերի կարծիքով՝ նախարարության նման բացթողումը ենթակա է քրեական պատասխանատվության:
Լեռնային Ղարաբաղը ՀԱՊԿ անդամ չէ, եւ կազմակերպությունը չի կարող ռազմական օգնություն ցուցաբերել Ստեփանակերտին: ՀԱՊԿ միացյալ շտաբի պետ Անատոլի Սիդորովի խոսքով՝ ՀԱՊԿ համաձայնագիրը ստորագրվել է Հայաստանի հետ, եւ սպառնալիքի դեպքում կազմակերպությունը վտանգի մեջ չի թողնի երկրին: Հայաստանի եւ Ադրբեջանի հարաբերությունները բավական լարված են, բայց, Սիդորովի կարծիքով, ոչ այնքան, որ երկու երկրները «միմյանցից մայրաքաղաքներ խլեն»: Զինվորականը, միաժամանակ, հիշեցրել է, որ ՀԱՊԿ-ն լիազորություն չունի միջամտել այս կամ այն հակամարտությանը, որում ներքաշված է կազմակերպության անդամ որեւէ պետություն:
Ազգային անվտանգության ծառայությունը հանցավոր խումբ է բացահայտել, որի անդամները երկար ժամանակ զբաղվել են պաշտոնական փաստաթղթերի կեղծմամբ եւ իրացմամբ: Պաշտոնական տեղեկատվության համաձայն՝ նրանք 2016-2017 թվականներին շուրջ 40 օտարերկրացու անվամբ զինծառայություն անցնելու փաստը հաստատող կեղծ փաստաթղթեր են իրացրել: Դրանք ստացած անձինք Հայաստանի քաղաքացու անձնագրեր են ստացել, բայց ազատվել են պարտադիր զինծառայությունից: Խմբի անդամները նաեւ Հայաստանի ու օտարերկրյա պետությունների քաղաքացիներին կեղծ վարորդական, ծննդյան, ամուսնության, կրթության եւ այլ վկայականներ են տրամադրել: Գործով մեղադրանք է առաջադրվել 11 անձի, այդ թվում՝ օտարերկրյա պետության 1 քաղաքացու: Մեղադրյալներից 4-ը կալանավորվել են, իսկ 7-ի նկատմամբ որպես խափանման միջոց ընտրվել է չհեռանալու մասին ստորագրությունը:
Իտալական «Ֆիորենտինա» եւ «Կալյարի» ֆուտբոլային ակումբները շրջանառությունից հանել են «13» խաղային համարը. երկու թիմերում էլ այս համարի ներքո է խաղացել օրերս հանկարծամահ եղած Դավիդե Աստորին: «Ֆիորենտինա»-ի ավագին մարտի 4-ին մահացած էին հայտնաբերել Ուդինե քաղաքում, հյուրանոցային համարում: «Ֆիորենտինան» Ուդինե էր մեկնել «Ուդինեզե»-ի դեմ արտագնա խաղի համար: 31-ամյա Աստորին մահացել է քնած ժամանակ, սրտի կանգի հետեւանքով: Դժբախտ դեպքի պատճառով Իտալիայի առաջնության՝ մարտի 4-ին նախատեսված բոլոր խաղերը հետաձգվել էին: Ֆուտբոլային կարիերայի ընթացքում Դավիդե Աստորին հանդես է եկել նաեւ Հռոմի «Ռոմա»-ում, 14 հանդիպում էլ անցկացրել է Իտալիայի ազգային հավաքականի կազմում:
Մարտի 6-ին դոլարն ու եվրոն աննշան էժանացել են: Դոլարի փոխարժեքը կազմել է 480 դրամ, եվրոյինը՝ 592, ռուբլունը՝ 8 դրամ 50 լումա, ֆունտինը՝ 664 դրամ:
Մարտի 7-ի գիշերը, 9-ին եւ 10-ի գիշերը հանրապետության շրջանների զգալի մասում տեղումներ են սպասվում: Օդի ջերմաստիճանը մարտի 7-8-ը 8-10 աստիճանով կբարձրանա: Երեւանում նույնպես գիշերը ժամանակ առ ժամանակ տեղումներ կլինեն: Մայրաքաղաքում գիշերը կդիտվի +8+10, ցերեկը՝ +13+15 աստիճան տաքություն: