ԱՄՆ Ֆինանսների նախարարությունը մտադիր է շարունակել ճնշումը Ռուսաստանի վրա, նախկինում մշակված «Կրեմլի ցանկը» կօգտագործվի հերթական պատժամիջոցների մշակման համար: Այս մասին ուրբաթ Ատլանտյան խորհրդում ասել է ֆինանսների փոխնախարար Սիգալ Մանդելկերը, ով վերահսկում է ահաբեկչության եւ ֆինանսական հետախուզության դեմ պայքարը, հաղորդում է ՏԱՍՍ-ը:
«Մենք կենտրոնացած ենք Ռուսաստանի վրա ճնշում գործադրելու ուղղությամբ», - ասել է նա` պատճառների թվում նշելով Ուկրաինայում ստեղծված իրավիճակը, Ղրիմի վերամիավորումը ՌԴ-ի հետ եւ ամերիկյան ընտրություններին Մոսկվայի ենթադրյալ միջամտությունը:
Փոխնախարարը հիշեցրել է, որ հունվարի վերջին ԱՄՆ Ֆինանսների նախարարությունը Կոնգրեսին ներկայացրել է բարձրաստիճան պաշտոնյաների եւ օլիգարխների ցանկը:
Բացի այդ, Մանդելկերը նշել է, որ ԱՄՆ-ն կոչ է անում Ռուսաստանին արտաքսել ԿԺԴՀ-ի ֆինանսական եւ առեւտրային ներկայացուցիչներին:
«Մենք կոչ ենք անում Ռուսաստանին արտաքսել Հյուսիսային Կորեայի ֆինանսական եւ առեւտրային ներկայացուցիչներին, որոնք բնակվում են նրա տարածքում, ինչպես Ռուսաստանից պահանջում է ՄԱԿ-ի Անվտանգության խորհրդի բանաձեւը», - ասել է Մանդելկերը:
Ավելի վաղ ՄԱԿ-ի Անվտանգության խորհուրդը միաձայն ԿԺԴՀ-ի դեմ նոր պատժամիջոցներ սահմանեց, որոնք զգալիորեն սահմանափակել են Փհենյանի արտահանման եւ ներմուծման հնարավորությունները: