Վարչական դատարանը բավարարել է ՊՆ դեմ հայց ներկայացրած զորացրված զինծառայող Ռազմիկ Պետրոսյանի պաշտպանի միջնորդությունը եւ պարտավորեցրել անվանացուցակ ներկայացնել մարտական հերթապահություն իրականացրած զինծառայողների անուններով: Այս մասին NEWS.am-ի հետ զրույցում ասաց Ռազմիկ Պետրոսյանի պաշտպան Աշխեն Դաշյանը` նշելով, որ նախորդ դատական նիստին ՊՆ-ի ներկայացրած անվանացուցակը չէր կարելի ապացույց համարել:
Նշենք, որ զորացրված Ռազմիկ Պետրոսյանը Վարչական դատարան հայցը ներկայացրել էր դեկտեմբերի 5-ին՝ ՊՆ-ից պահանջելով զինգրքույկում համապատասխան գրառում կատարել ապրիլյան պատերազմի մարտական գործողություններին մասնակցելու մասին։
«Պաշտպանության նախարարությունը նորից պնդեց, որ հայցը ենթակա է մերժման: Նախարարությունը փոխանակ պարզի, թե իրավաչափ են վարվել զինվորի հետ, որ գրառում չեն կատարել, պարզապես անվանացուցակներ էր ներկայացրել: Մենք վիճարկեցինք այդ անվանացուցակները, քանի որ դրանք որեւէ հրամանատարի կողմից հաստատված չեն, կնիքված չեն, եւ մենք չենք կարող դա հիմք ընդունել: Դրանք ընդամենը A4 ֆորմատի թղթի վրա գրված անուններ էին, եւ բոլորը կարող էին նման ցուցակ ներկայացնել: Մենք պահանջել ենք՝ որ նորմալ անվանացուցակ ներկայացնեն, որպեսզի մենք դա կարողանանք ապացույց համարել»,-ասաց փաստաբանը:
Դատարանը, Աշխեն Դաշյանի խոսքով, նաեւ պարտավորեցրել է ՊՆ-ին, որ այդ զորամասում, այդ ժամանակահատվածում ծառայած զինծառայողների զինգրքույկների քաղվածքները ներկայացնել, որպեսզի իրենք հասկանան` մարտական գործողություների մասնակցելու մասին գրառումները կան, թե` ոչ:
Նշենք, որ Ռազմիկ Պետրոսյանը որեւէ արտոնությունից չի ցանկանում օգտվել, քանի որ գտնվում է արտերկրում, ուղղակի ցանկանում է վերականգնել իր իրավունքները եւ արդարությունը: