Մարտի 24-ի կեսօրից մինչեւ մարտի 25-ի կեսօր Հայաստանի տարածքում վտանգավոր քամիներ են սպասվում: Արտակարգ իրավիճակների նախարարությունը քաղաքացիներին զգուշավորության կոչ է անում: «Հիդրոմետ»-ի օդերեւութաբանության կենտրոնի պետ Գագիկ Սուրենյանն այսօր նաեւ նշել է այն մարզերը, որտեղ քամին առավել վտանգավոր կլինի:
Սպասվող քամու արդյունքում հնարավոր վնասները նվազեցնելու նպատակով գյուղնախարարությունը հորդորել է ուշադրության կենտրոնում պահել ջերմոցները. լրացուցիչ ամրացնել դրանց թաղանթապատ ծածկերը, ամուր փակել օդանցքները: Արդեն երկուշաբթի կլիմայական պայմանները կվերադառնան նորմային:
Հայաստանի գլխավոր օդերեւութաբանը նաեւ խոսել է կլիմայական անոմալիաներից. 2017-2018 թվականներն այդ առումով բացառիկ էին: 2017 թվականի ձմեռը չափազանց ցուրտ էր, ամառը՝ չափազանց շոգ ու երաշտային, ինչը, հիշեցնենք, աննախադեպ անտառային հրդեհների պատճառ դարձավ: Իսկ այս տարվա փետրվարն օդերեւութաբանական դիտարկումների պատմության մեջ ամենատաքն էր. օդի ջերմաստիճանը կլիմայական նորմայից բարձր է եղել 6-8 աստիճանով: Տաք ձմեռը նպաստեց, որպեսզի պտղատու ծառերը ժամկետից վաղ ծաղկեն: Սակայն ցրտահարության վտանգ, համենայն դեպս այս պահին, Գագիկ Սուրենյանը չի կանխատեսում: Հավելենք, որ այսօր՝ մարտի 23-ին, Օդերեւութաբանի միջազգային օրն է, ինչի առիթով շնորհավորում ենք բոլոր օդերեւութաբաններին:
Ազգային ժողովում այսօր կրկին արտահերթ նիստ էր՝ օրակարգային 10 հարցով: Դրանք հիմնականում պայմանավորված էին Սահմանադրական փոփոխություններով: Հանրապետական խմբակցությունն առաջարկել է առանց ընդմիջման աշխատել, «Ծառուկյան» եւ «Ելք» խմբակցությունների պատգամավորներն ընդդիմացել են:
Ի վերջո, առաջարկը քվեարկության է դրվել եւ որոշվել է առանց ընդմիջման աշխատել: Իսկ այսօր քննարկման էր ներկայացվել նաեւ «Կառավարության կառուցվածքի եւ գործունեության մասին» օրենքի նախագիծը: Այն ընդունվել է, ինչի արդյունքում նոր կառավարությունում հետեւյալ պատկերը կլինի. կունենանք վարչապետ, առաջին փոխվարչապետ, եւս երկու փոխվարչապետ եւ 17 նախարար՝ այժմյան 18-ի փոխարեն:
Ի դեպ՝ այս նախագծի եւ հարակից օրինագծերի փաթեթի քննարկման ժամանակ Դավիթ Հարությունյանը նաեւ նշել է, որ Երեւանի ավագանու նիստերի լուսաբանման նոր կարգ է սահմանվում. կգործեն նույն կանոնները, ինչ Ազգային ժողովի պարագայում: Նախարարը վստահ է, որ այդպես աշխատանքն ավելի արդյունավետ կլինի: Այս փոփոխության առիթը, ըստ ամենայնի, փետրվարի 13-ի Երեւանի ավագանու նիստն է, որտեղ միջադեպ էր գրանցվել. ավագանու ՀՀԿ-ական անդամները բռնություն էին կիրառել «Երկիր ծիրանի» խմբակցության անդամների նկատմամբ, ինչը լրագրողներն արձանագրել էին:
Ֆրանսիայի Տրեբ կոմունայում 25-ամյա մարոկկացին սուպերմարկետում մարդկանց է պատանդառել: Նա հայտարարել է, որ հարում է «Իսլամական պետություն» ահաբեկչական խմբավորմանը եւ պահանջել ազատ արձակել 2015 թվականի նոյեմբերին Փարիզում ահաբեկչությունների գործով գլխավոր կասկածյալ Սալեհ Աբդեսլամին: Ականատեսներից մեկը պատմել է, որ անծանոթը սուպերմարկետ է մտել եւ «Ալլահ աքբար» բղավել: Որոշ ժամանակ անց մարոկկացին ազատ է արձակել պատանդներին: Ահաբեկչության հետեւանքով 3 մարդ է զոհվել: Ավելի ուշ, բանակցություններից հետո, իրավապահները գնդակահարել են նաեւ պատանդառուին: Տրեբից բացի՝ գրեթե միաժամանակ, միջադեպ է տեղի ունեցել նաեւ Կարկասոն կոմունայում. այստեղ անհայտ անձը կրակ է բացել հատուկ նշանակության ջոկատի ուղղությամբ: Մեկ իրավապահ է տուժել: Առայժմ, սակայն, հայտնի չէ, արդյո՞ք այս միջադեպերը կապ ունեն իրար հետ:
Արցախ այցելելու համար ձերբակալված եւ մի քանի ամիս ադրբեջանական բանտում անցկացրած բլոգեր Ալեքսանդր Լապշինը Երեւան է այցելելու: Նա Facebook-ում գրել է, որ Հայաստան է գալու՝ տուրիստական ցուցահանդեսի մասնակցելու: «Պետք է ներկայացնեմ «Լապշինի հետքերով դեպի Բաքու» հեղինակային ծրագիրը, որում ներառված է Մեհրիբան Ալիեւայի անձնական օդանավով թռիչքը, Քուրդահանի բանտում all inclusive հանգիստը եւ Բաքվի ծանր հանցագործությունների դատարանը»,- գրել է Լապշինն ու անմիջապես հավելել, որ կատակում է: Ապրիլլի 20-22-ը Երեւանում նախանշված In Tour Expo 2018 միջազգային ցուցահանդեսին բլոգերը խոսելու է ճամփորդությունների մասին. խոստանում է, որ հետաքրքիր է լինելու:
Լեւոն Արոնյանը, կարծես, վերջնականապես կորցրեց Շախմատի աշխարհի չեմպիոնի կոչմանը հավակնելու հնարավորությունը: Բեռլինում չեմպիոնի հավակնորդների մրցաշարում արդեն 11-րդ տուրի պարտիաներն են անցկացվում: Իսկ նախորդ 10 տուրերում հայ գրոսմայստերը տարել է ընդամենը մեկ հաղթանակ, կրել է 4 պարտություն, 5 պարտիա էլ ոչ ոքի է ավարտել: Նա 3.5 միավորով եզրափակում է մրցաշարային աղյուսակը: Աշխարհի չեմպիոնի հավակնորդների մրցաշարի մրցանակային հիմնադրամը 420 հազար եվրո է: Մրցաշարի հաղթողն իրավունք կստանա նոյեմբերի 9-28-ը Լոնդոնում կայանալիք մրցամարտում աշխարհի գործող չեմպիոն, նորվեգացի Մագնուս Կարլսենի հետ վիճարկել համաշխարհային թագը:
Արտարժույթի շուկայում վայրիվերումները շարունակվում են: Մարտի 23-ին դոլարը նորից սկսել է արժեւորվել, եվրոն թուլացել է: Դոլարի փոխարժեքը կազմել է 480 դրամ, եվրոյինը՝ 591, ռուբլունը՝ 8 դրամ 40 լումա, ֆունտինը՝ 676 դրամ:
Մարտի 24-ի երեկոյան ժամերին, 25-ին եւ 28-ի երեկոյան հանրապետության շրջանների զգալի մասում սպասվում է կարճատեւ անձրեւ եւ ամպրոպ: Օդի ջերմաստիճանը 24-ին 4-5 աստիճանով կբարձրանա, 25-ի ցերեկն ու 26-ի գիշերը՝ նույնքան կնվազի: Երեւանում նույնպես վաղը երեկոյան ժամերին կարճատեւ անձրեւ կլինի: Մայրաքաղաքում գիշերը կդիտվի +13+15, ցերեկը՝ +21+23 աստիճան տաքություն: