Իշխող կոալիցիան փլուզվեց. ՀՅԴ-ն հայտարարել է ՀՀԿ-ի հետ կնքված կոալիցիոն համաձայնագրից դուրս գալու մասին: Կուսակցության հայտարարության համաձայն՝ այդ քայլին գնում են՝ հաշվի առնելով վերջին օրերին երկրում ստեղծված իրավիճակը: Դաշնակցությունում կարծում են, որ հիմա Ազգային ժողովը պետք է ժողովրդի վստահությունը վայելող վարչապետ ընտրի:
Իսկ «Ելք»-ը վարչապետի պաշտոնում արդեն առաջադրել է Նիկոլ Փաշինյանին: Նրա թեկնածությունը սատարելու պատրաստակամության մասին հայտարարել է «Ծառուկյան» խմբակցությունից Նաիրա Զոհրաբյանը: Եթե խմբակցության մյուս պատգամավորները եւս հետեւեն Զոհրաբյանի օրինակին, Փաշինյանի օգտին կքվեարկի 40 պատգամավոր, իսկ ընտրվելու համար «Ելք»-ի վարչապետի թեկնածուին անհրաժեշտ է 53 ձայն: Եվս 7 պատգամավոր ունի Դաշնակցությունը, սակայն կուսակցությունը դեռ այդ հարցով որոշում չի կայացրել:
Ամեն դեպքում, Էդմոն Մարուքյանը կարծում է, որ կկարողանան իրենց թեկնածուին ընտրելու համար անհրաժեշտ 53 պատգամավորի ձայն ապահովել: Նա չի բացառում, որ Փաշինյանի թեկնածությանը կողմ կքվեարկեն նաեւ մի շարք հանրապետականներ: Վահրամ Բաղդասարյանը, սակայն, վստահեցնում է, որ ՀՀԿ խմբակցությունը միասնական է, առաջիկայում էլ որոշում կկայացնի վարչապետի թեկնածուի հարցում եւ կհայտնի այդ մասին: Լրագրողները հետաքրքրվել են նաեւ, թե հնարավո՞ր է, որ Սերժ Սարգսյանը հրաժարական տա նաեւ ՀՀԿ նախագահի պաշտոնից:
Իսկ պաշտոնաթողությունից հետո երկու օր շարունակ լռություն պահպանող Սերժ Սարգսյանն այսօր հանդես է եկել հայտարարությամբ: Նա Հանրապետական խմբակցության պատգամավորներին հրավիրել է հանդիպման՝ հանգամանալից բացատրելու իր հրաժարականի պատճառները, իր դիտարկումները ներկայացնելու կուսակցության ապագայի, կուսակցության նոր առաջնորդության եւ բարեփոխման կարեւորության, տարբերվող դերակատարմամբ Խորհրդարանում աշխատելով՝ երկրի զարգացմանը նպաստելու վերաբերյալ: Սարգսյանն ընդգծել է, որ խոսելու է խաղաղության ու կայունության մասին:
Մինչ այդ, երեկ հայտարարվեց, որ Փաշինյանն ու վարչապետի ժամանակավոր պաշտոնակատար Կարեն Կարապետյանն այսօր դռնփակ հանդիպում են ունենալու: Ավելի ուշ Նիկոլ Փաշինյանը արտասահմանյան լրատվամիջոցների ներկայացուցիչների հետ հանդիպմանը հայտարարեց, որ Հանրապետականի իշխանությունը Հայաստանում ավարտված է, եւ այդ կուսակցությունից ոչ ոք վարչապետ լինելու: Կարճ ժամանակ անց տեղեկություն տարածվեց, որ Փաշինյան-Կարապետյան հանդիպումը չի կայանալու: Կարեն Կարապետյանը պարզաբանեց, որ Փաշինյանը միակողմանի նոր պայմաններ է առաջադրել, մասնավորապես, որ բանակցելու է բացառապես իր օրակարգի շուրջ: Նա նաեւ հավելել է, որ պատրաստ են քննարկել իրավիճակի հանգուցալուծման ցանկացած տարբերակ՝ ընդհուպ արտահերթ ընտրությունների անցկացումը: Նախագահ Արմեն Սարգսյանն իր հերթին կողմերին երկխոսության կոչ է արել եւ խորհրդակցություններ սկսել խորհրդարանական եւ արտախորհրդարանական ուժերի հետ:
Մինչ այդ, Փաշինյանը հայտարարեց քաղաքացիական անհնազանդության ակցիաները շարունակելու մասին: Նրա գլխավորած «Իմ քայլը» շարժման մասնակիցներն այսօր առավոտից նորից երթեր են անցկացրել Երեւանի փողոցներում: Ցուցարարներն այսօր քայլում էին՝ վանկարկելով «ՀՀԿ, հեռացիր» եւ «Նիկոլ, վարչապետ»:
Ակցիաներ են անցկացվել նաեւ հանրապետության այլ բնակավայրերում: Իջեւանի եւ հարակից գյուղերի բնակիչները փակել են դեպի Բագրատաշեն տանող միջպետական ճանապարհը, Վանաձորի պետական համալսարանի ուսանողները դասադուլ են հայտարարել, բողոքի ակցիաներ են անցկացվել նաեւ Գյումրիում: Այստեղ, ի դեպ, ցուցարարներին է միացել նախկին քաղաքապետ Վարդան Ղուկասյանը:
Արցախում զինծառայող է վիրավորվել: Արցախի պաշտպանության նախարարության տեղեկացմամբ՝ պաշտպանության բանակի հյուսիսային ուղղությամբ տեղակայված զորամասերից մեկի պահպանության տեղամասում հակառակորդի արձակած կրակոցից թեթեւ վիրավորում է ստացել 20-ամյա Մարտուն Նվերի Խերունցը: Զինծառայողի կյանքին վտանգ չի սպառնում:
Երեւանում մահվան ելքով վրաերթ է տեղի ունեցել: Արարատյան փողոցում «Մերսեդես»-ի վարորդը վրաերթի է ենթարկել Նոյեմբերյանի բնակիչներ Գարիկ Աբովյանին եւ Արծրուն Չիլինգարյանին: Ստացած մարմնական վնասվածքներից վերջինները մահացել են: Իսկ վրաերթից հետո մեքենան բախվել է հանդիպակաց ուղեգոտում գտնվող ճաղավանդակներին, ինչի հետեւանքով 3 ուղեւորները մարմնական վնասվածքներով հիվանդանոց են տեղափոխվել: «Մերսեդես»-ի վարորդը՝ 59-ամյա Մարտին Գրիգորյանը ձերբակալված է: Նախնական տվյալներով՝ նա մեքենան վարել է ոչ սթափ վիճակում:
Ապրիլի 25-ին դոլարն ու ռուբլին փոքր-ինչ թանկացել են, եվրոն՝ էժանացել: Դոլարի փոխարժեքը կազմել է 480 դրամ, եվրոյինը՝ 586, ռուբլունը՝ 7 դրամ 78 լումա, ֆունտինը՝ 670 դրամ:
Ապրիլի 26-ին հանրապետության առանձին շրջաններում տեղումներ են սպասվում, որոշ հատվածներում հնարավոր է կարկուտ: Օդի ջերմաստիճանը 3-4 աստիճանով կբարձրանա: Երեւանում վաղը տեղումներ չեն սպասվում: Մայրաքաղաքում գիշերը կդիտվի +7+9, ցերեկը՝ +24+26 աստիճան տաքություն:
