«Բարեխիղճ քաղաքացիները, որոնք վճարել են ՃՈ տուգանքները, ասում են՝ վերադարձրեք մեր գումարները: Այս մասին, այսօր՝ մայիսի 24-ին, կառավարության նիստում հայտարարել է ՀՀ ոստիկանապետ Վալերի Օսիպյանը:
«Տարբեր կարծիքներ կան համացանցում, հիմա պետք է մենք փորձենք բացատրել եղելությունը ու մեր կայացրած այս որոշման հետևանքները», - ասաց նա:
Սրան արձագանքեց վարչապետ Նիկոլ Փաշինյանը՝ նշելով, որ պետք է տեսակետները քննարկել ու կայացնել հավասարակշռված որոշում։
«Ենթադրվում է, որ կան լուծումներ, այո՚, բարեխիղճ քաղաքացիները վճարել են, շատ-շատերը չեն վճարել, որովհետև մեծ հավանականությամբ չեն ունեցել, հիմա պարոն Միրզոյանն էլ է ասում վճարել է, ես էլ եմ վճարել, դո՞ւք էլ եք վճարել պարոն Օսիպյան, իսկ պարոն Զեյնալյանը նախկինում չի վճարել, բայց որոշել է քաղաքական իրավիճակի փոփոխություններից հետո վճարել», - ասաց Նիկոլ Փաշինյանը։
Նշենք, որ կառավարության նիստում ավելի վաղ արդարադատության նախարար Արտակ Զեյնալյանը տեղեկացրել էր, որ նախարարությունը e-draft.am կայքում տեղադրել է վարչական տուգանքների համաներման մասին օրենքի նախագիծը։ Նրա խոսքով, առաջիկայում, երբ որ լրանան ժամկետները, իրենք նախագիծը կներկայացնեն կառավարության հաստատմանը, որպեսզի գնա Ազգային ժողով
Նիկոլ Փաշինյանը ՀՀ ոստիկանապետից հետաքրքրվեց, թե համաներումը որ ժամկետների համար պետք է իրականացնել, ինչին Օսիպյանը պատասխանե՝ մինչեւ 2017-ի դեկտեմբերի 31-ը եւ վերջին իրադարձությունների օրերը, երբ տեղի էին ունենում երթեր, ցույցեր: