Ժամեր առաջ աշխատանքի եւ սոցիալական հարցերի նախարարության պաշտոնից հրաժարական ներկայացրած Մանե Թանդիլյանն «Ազատության» «Ֆեյսբուքյան ասուլիս»–ում հայտարարել է, որ իր պատկերացումները չեն համապատասխանում կառավարության տեսլականին, ինչի պատճառով էլ լքել է պաշտոնը։ «Կառավարության նիստի ընթացքում, ըստ էության, որոշում կայացվեց այնպիսին, որը հակասում էր այն նախագծին, որը ես էի ներկայացրել, որ պարտադիր բաղադրիչը հետաձգվի։ Ես հնարավորություն էի տեսնում համակարգը դարձնել այնպիսին, որ այն կուտակային համակարգը դառնար գրավիչ, լսելի լինեին բոլոր առաջարկությունները։ Պարտադիրը հիմա էլ գործում էր որոշների համար։ Կային հետաքրքիր մեխանիզմներ, որոնք կուտակային համակարգը պետք է դարձնեին ընդունելի։ Կառավարության հավանությանը չարժանացավ իմ առաաջարկությունը, հավանության արժանացավ այն նախագիծը, որը հակասում է այն տեսակետին, ինչ ես ունեմ»,–ասել է նախկին նախարարը։
Մանե Թանդիլյանը շեշտել է, որ այդ հարցին առնչվող առաջնահերթ ոլորտը իր զբաղեցրած ոլորտն էր, եւ ծրագիրը չէր համապատասխանում իր տեսլականին։
«Այն չէր համապատասխանում կենսաթոշակային բարեփոխումների իրականացման իմ տեսլականին եւ հնարավոր չէր, որ շարունակեի աշխատել որպես նախարար։ Ես ունեմ պատիկերացումներ, որոնք չեն համապատասխանում այսօրվա կառավարության տեսլականին»։