Ջերմուկում, այսօր՝ հուլիսի 6-ին, Ամուլսարի հարցի վերաբերյալ հրավիրված քննարկման ժամանակ ՀՀ վարչապետ Նիկոլ Փաշինյանը, նաեւ «Լիդիան Արմենիա» ընկերության ներկայացուցիչներն ու հանքի շահագործման դեմ բողոքող ցուցարարները համաձայնության չեկան հանքի փորձաքննություն նշանակելու հարցում:
NEWS.am-ի թղթակիցը հաղորդում է, որ երկար քննարկումից հետո Նիկոլ Փաշինյանն ասաց, որ շտապում է, այլեւս չի կարող մնալ: Նա հայտարարեց, որ կառավարությունը այս խնդիրը կքննարկի եւ իր դիրքորոշումը կհայտնի առաջիկայում: Վարչապետի հեռանալուց հետո հանքի շահագործման դեմ պայքարող ցուցարարները հայտարարեցին, որ որեւէ զիջում չի լինելու պայքարելու են միչեւ վերջ:
Նշենք, որ արդեն 13-րդ օրն է, ինչ Ամուլսարի հանքի շահագործման դեմ բողոքող ակտիվիստները փակ են պահում դեպի Ամուլսար տանող ճանապարհները` պահանջելով դադարեցնել հանքի շահագործումը:
Միջազգային փորձագետները, որոնք տեղում ծանոթացել են իրավիճակին, պնդում են, որ «Ամուլսարում» հանքի շահագործումը վտանգում է Հայաստանի ջրային ռեսուրսները: Մասնավորապես, մեծ է թթվային դրենաժի հնարավորությունը եւ եթե այդպիսի բան լինի մակերեւութային եւ ստորգետնյա ջրերում, ապա դա արտազատվելու է եւ ջրերի մեջ է մտնելու: Քանի որ թթվային դրենաժը հարյուրավոր տարիներ է տեւելու, փորձագետները պնդում են, որ Ամուլսարի հանքը շահագործող «Լիդիան ինթերնեշնլ» ընկերությունը պետք է մաքրման կայան կառուցի, որը պետք է գործի ոչ միայն հանքի շահագործման առաջին օրվանից մինչեւ փակումը, այլեւ շահագործումից հետո եւս առնվազն 200 տարի. «Հնարավոր ռիսկերը, կարող են տեւել հավերժ, քանի որ առաջանալու են թունավոր թափոններ, որոնք առաջացնում են թթվային դրենաժ, որը կարող է ազդել ջրային համակարգի, դրա մեջ բնակվող կենսաբազմազանության վրա»:
«Լիդիան Արմենիա» ընկերությունը, սակայն, անդրդրվելի է. մի քանի օր է՝ ցույցեր են անում նաեւ ընկերության աշխատակիցները՝ պահանջելով չխանգարել իրենց աշխատանքին: Ըստ ընկերության գործադիր տնօրեն Հայկ Ալոյանի՝ բողոքի ակցիաների պատճառով արդեն իսկ 3.5 միլիոն դոլարի վնաս են կրել: Ընկերությունը մտադիր է դիմել դատարան: