Երեւանում բացվել է տարածաշրջանի միակ չինական դպրոցը: Բացման արարողությունից հետո վարչապետ Նիկոլ Փաշինյանը շրջել է շենքում, ծանոթացել ստեղծված պայմաններին, Չինաստանի դեսպանի հետ դպրոցի բակում եղեւնի տնկել, իսկ վերջում՝ լուսանկար եւ, իհարկե, վարչապետի սիրելի սելֆին:
Դպրոցում ուսուցումը կիրականացվի տեղական հանրակրթական ծրագրով, իսկ 5-12-րդ դասարանների աշակերտները խորացված չինարեն ուսումնասիրելու հնարավորություն կունենան: Ընդունելության կարգը միայն այսօր է հաստատվել, սակայն նախապես արդեն մեծ թվով դիմումներ են ստացվել: Կրթության նախարարը դպրոցի շուրջ ստեղծված իրարանցումը տարօրինակ է համարում: Նշենք, որ «Հայ-չինական բարեկամության դպրոցի» համար չինական կողմը 12 մլն դոլար է ներդրել եւ կրթօջախն անհատույց նվիրել Հայաստանին:
Հայ-չինական դպրոցի բացումից հետո լրագրողների հետ զրույցում վարչապետն անդրադարձել է Հանրապետության հրապարակում հրավիրած հանրահավաքի ժամանակ իր ելույթին: Հնչած մի քանի հայտարարություններ հարցականներ էին առաջացրել, որոշներն էլ՝ քննադատության տեղիք տվել: Նախ՝ Ազգային ժողովը ցրելու վերաբերյալ սահմանադրական փոփոխություն առաջարկելու եւ հարցը հանրաքվեի դնելու մասին: Ասաց՝ դա կոնկրետ առաջարկ էր, բայց կարող են լինել նաեւ հարցի լուծման այլ տարբերակներ:
Անցումային արդարադատությունն էլ, ըստ Փաշինյանի, համաշխարհային ընդունված գործիք է, նույնիսկ իշխանափոխության հենց հաջորդ օրերից միջազգային կազմակերպությունների հետ այս մեխանիզմների մասին քննարկումներ են ունեցել: Հանրահավաքի ժամանակ Նիկոլ Փաշինյանի որոշ հայտարարություններ քննադատել էր օրերս նաեւ Ազգային ժողովի նախագահը՝ մտահոգություն հայտնելով երկրում ստեղծված իրավիճակի կապակցությամբ: Նիկոլ Փաշինյանը պատրաստվում է հանդիպել Արա Բաբլոյանի հետ եւ փարատել մտահոգությունները:
Քաղաքականություն Ռոբերտ Քոչարյանի վերադարձը Նիկոլ Փաշինյանին չի անհանգստացնում: Իսկ երկրորդ նախագահի՝ վարչապետ ընտրվելու հավանականությունն անհնար սցենար է համարում: Եվ՝ «Ելք» դաշինքի մասին. Նիկոլ Փաշինյանը վստահեցրեց՝ դաշինքը չի պառակտվել:
Հայ-թուրքական սահմանի Արտաշատի հատվածում 5 սահմանախախտ է ձերբակալվել: Նրանք Աֆղանստանի քաղաքացիներ են, Արաքս գետով ապօրինի կերպով հատել են Հայաստանի պետական սահմանը: Ստուգման արդյունքում պարզվել է՝ ձերբակալվածները նույն ընտանիքի անդամներ են, ցանկացել են ԵՄ որեւէ երկիր մեկնել: Սահմանի անօրինական հատումը նրանք բացատրում են տեղանքում մոլորվելու հանգամանքով: Ձերբակալվածները փոխանցվել են Հայաստանի իրավապահ մարմիններին: Հավելենք, որ այս տարեսկզբից հայ-թուրքական սահմանի միայն այս հատվածում ձերբակալվածների թիվն արդեն շուրջ երկու տասնյակ է:
Գեներալ Մանվել Գրիգորյանը հիվանդանոցում է: Նրա պաշտպաններից Արայիկ Ալվանդյանը տեղեկացրել է, որ Գրիգորյանը դատաբժշկական փորձաքննության է ենթարկվում եւ արդեն մի քանի օր է՝ հետազոտություններ են անցկացվում:
Ապօրինի զենք եւ զինամթերք պահելու եւ խոշոր չափի յուրացումների մեջ մեղադրվող Մանվել Գրիգորյանի կալանքի ժամկետը, հիշեցնենք, եւս 2 ամսով երկարաձգվել է, չնայած պաշտպանները պարբերաբար ահազանգում են նրա առողջական լուրջ խնդիրների մասին: Գեներալի տանն ու ամառանոցում իրականացված խուզարկության արդյունքում ԱԱԾ-ն մեծ քանակությամբ զենք, զինամթերք, թանկարժեք ավտոմեքենաներ էր հայտնաբերել, ինչպես նաեւ ապրիլյան պատերազմի մասնակիցներին ուղարկված սնունդ:
Ուկրաինայում Հայաստանի դեսպանը հրաժարական է տալիս: Անդրանիկ Մանուկյանը Facebook-ում գրել է, որ որոշել է թողնել դիվանագիտական աշխատանքը: Ավելին, նա խոստովանել է, որ վերջին տարիներին մի քանի անգամ դիմել է Երեւանին՝ իրեն հետ կանչելու խնդրանքով, սակայն մերժվել է: Դեսպանը գրել է նաեւ, որ Հայաստանում հիմա բոլորովին այլ իրավիճակ է եւ ժամանակն է ճանապարհ տալ երիտասարդներին: Արտգործնախարարությունում, սակայն, առայժմ որեւէ տեղեկություններ չունեն Անդրանիկ Մանուկյանի հրաժարականի վերաբերյալ հայտարարության ներկայացման մասին:
Բելգիայի թագավոր Ֆիլիպն ընտանիքի հետ Հայաստանում է: Արտգործնախարարությունից տեղեկացրել են, որ թագավորական ընտանիքի այցը մասնավոր է, հետեւաբար այլ մանրամասներ հայտնել չեն կարող: ԱԳՆ-ի կողմից, ի դեպ, որեւէ հրավեր չի եղել: Նշենք, որ Ֆիլիպ թագավորը գահ է բարձրացել 2013 թվականի հուլիսին՝ փոխարինելով հորը՝ Ալբերտ II-ին։
Օգոստոսի 22-ին դոլարն ու եվրոն թանկացել են: Դոլարի փոխարժեքը կազմել է 482 դրամ, եվրոյինը՝ 559, ռուբլունը՝ 7 դրամ 14 լումա, ֆունտինը՝ 622 դրամ:
Օգոստոսի 23-ին հանրապետության որոշ շրջաններում սպասվում է թույլ անձրեւ, առանձին հատվածներում՝ մառախուղ: Օդի ջերմաստիճանն էապես չի փոխվի: Երեւանում վաղը տեղումներ չեն սպասվում: Մայրաքաղաքում գիշերը կդիտվի +18+20, ցերեկը՝ +31+33 աստիճան տաքություն:
