Բագրատաշենի մաքսակետում մաքսազերծումից խուսափելու նպատակով ներկրողները հնարքների են դիմում․ 168.am-ի տվյալներով՝ բեռնատարները չեզոք գոտում դատարկում են պտուղ-բանջարեղենի, հագուստի բեռները, 50 կգ-ական քաշով ապրանքն անհատների միջոցով անցկացնում են Հայաստանի տարածք՝ առանց մաքսազերծելու, ապա նորից բարձում բեռնատարները։
Բացի այդ՝ ներմուծող ընկերությունները վրացական մաքսակետն ներկայացնում են իրական հաշիվ-ապրանքագրերը, ապա փոխում են դրանք ու հայկական մաքսավորներին ներկայացնում ավելի ցածր արժեքով հաշիվ-ապրանքագրեր եւ մաքսազերծումն իրականացնում ավելի մատչելի գնով։
168.am-ի հարցմանն ի պատասխան ՊԵԿ տեղեկատվության և հասարակայնության հետ կապերի բաժնից հայտնել են, որ առանց ներմուծման մաքսատուրքերի և հարկերի անձնական օգտագործման ապրանքների տեղափոխման համար ներկա պահին գործող բնաիրային և արժեքային չափերը (1500 եվրո, 50կգ) Եվրասիական տնտեսական հանձնաժողովի 1 նոյեմբերի 2018.թ թիվ 91 որոշման համաձայն՝ 2019 թվականի հունվարի 1-ից նվազեցվել են մինչև 500 եվրո և 25կգ, որի միջոցով հսկողությունը կխստացվի։
«Այս խնդրի կապակցությամբ հսկողական աշխատանքներ են իրականացվում նաև ՊԵԿ հարկային ծառայության ստորաբաժանումների կողմից՝ առանց փաստաթղթային հիմքերի ներքին շուկայում իրացվող ապրանքները և դրանց փաստացի տերերին հայտնաբերելու ուղղությամբ։ Հաշիվ-ապրանքագրերի փոխարինման դեպքերի վերաբերյալ մենք նույնպես ստացել ենք ահազանգեր, որոնց կապակցությամբ Վրաստանի Հանրապետության պատկան մարմիններին արվել են համապատասխան հարցումներ և արդեն իսկ ստացվել են դրանց պատասխանները։ Այդ կապակցությամբ իրականացվող աշխատանքները դեռևս ընթացքի մեջ են։ Հավաստիացնում ենք, որ գործընթացը գտնվում է ՊԵԿ ուշադրության կենտրոնում»,- պատասխանել են ՊԵԿ-ից։