Կենտրոնական բանկի նախագահ Արթուր Ջավադյանը կառավարության անդամներին ապակողմնորոշում է։ Այս մասին NEWS.am-ի հետ զրույցում ասաց «Գեւորգյան եւ ընկերություն» ՍՊԸ տնօրեն Մհեր Գեւորգյանը՝ անդրադառնալով կառավարության նիստում ԿԲ նախագահի հայտարարությանը այն մասին, թե գրավատները 100 կամ 80 տոկոսով վարկեր են տալիս, անգամ դրանից էլ ավելի։
«ԿԲ նախագահ Արթուր Ջավադյանը գրավատները համեմատելով բանկերի հետ կառավարության անդամներին ապակողմնորոշում է։ Բանկերը առավելագույն 24 տոկոս տոկոսադրույքը սահմանելուց զատ միաժամանակ կիրառում են բազմաթիվ լրացուցիչ գումարներ՝ միջնորդավճարներ, որոնք լրացուցիչ բեռ են սպառողի համար, հասցնելով 100-120 տոկոսի։ Սակայն խոսքը գրավատներին չի վերաբերում։ Գրավատները միջնորդավճարներ չեն կիրառում, իրականացնում են կարճաժամկետ վարկեր՝ առավելագույնը մինչեւ վեց ամիս»,–նշեց նա։
Գրավատան ներկայացուցիչը պարզաբանեց, որ իրենք առավելագույնը 30 տոկոս տոկոսագումար են ստանում. «Եթե միջինացված գրավատունը վարկը տրամադրում է 4-5 տոկոսով, տարեկան կազմում է 60 տոկոս, սակայն քանի որ գրավատները 1 տարով պայմանագիր չենք կնքում, ստացվում է առավելագույնը 30 տոկոս»։
Նրա համար Ջավադյանի այս հայտարարությունը անհամաչափ է եւ ոչ պրոֆեսիոնալ. «Գրավատները չեն տրամադրում գյուղացիական վարկեր, հիփոթեքային վարկեր, ոչ արտարժույթով վարկեր, միայն ֆիզիկական անձանց, միայն շարժական գույքի գրավադրմամբ, շատ փոքր գործառույթ ենք իրականացնում եւ համեմատել գրավատունն ու բանկերը, անհամաչափ է եւ ոչ պրոֆեսիոնալ»։
Հիշեցնենք, որ այսօր կառավարության նիստում Արթուր ջավադյանը նշել է, որ գրավատներում տոկոսադրույքները հասնում են 80, 100 եւ անգամ 120 տոկոսի, որին ի պատասխան ՀՀ վարչապետ Նիկոլ Փաշինյանը նշել էր, թե մամուլի հրապարակումներից այնպիսի տպավորություն է, որ կառավարությունն ընկել է խեղճուկրակ լոմբարդների հետեւից եւ ուզում է խեղդել փոքր ու միջին բիզնեսը:
Ավելի վաղ NEWS.am-ը հայտնել էր, որ կառավարությունն առաջարկում է «Պետական տուրքի մասին» ՀՀ օրենքում փոփոխություններ կատարել, ըստ որոնց 60 անգամ, այն է՝ 6000 տոկոսով, ավելացվելու է նշյալ ոլորտների պետական տուրքը․ գրավատների համար ներկայիս 100 000 դրամի փոխարեն սահմանվելու է 6 մլն, փոխանակման կետերի համար՝ 50 000-ի փոխարեն 3 մլն դրամ պետական տուրք:
