Հայաստանն ու Ադրբեջանը դադարեցրել են մարտական գործողությունները ԼՂ հակամարտության գոտում, երկու երկրների զինված ուժերի ստորաբաժանումները կանգ են առել զբաղեցրած սահմաններում: Այս մասին հայտարարել է ՌԴ Զինված ուժերի Գլխավոր շտաբի գլխավոր օպերատիվ վարչության պետ Սերգեյ Ռուդսկոյը, հաղորդում է ՏԱՍՍ-ը:
«Ներկայումս մարտական գործողությունները դադարեցված են: Երկու երկրների զինված ուժերի ստորաբաժանումները կանգ են առել զբաղեցրած սահմաններում»,-ասել է նա ճեպազրույցի ժամանակ:
Նրա խոսքով՝ «մարտական գործողությունների եւ կրակի դադարեցման մասին համաձայնությունների կատարումը վերահսկելու համար Լեռնային Ղարաբաղի տարածքում եւ Լաչինի միջանցքում Ռուսաստանի Դաշնության խաղաղապահ կոնտինգենտ է տեղակայվում»:
Ռուդսկոյը նշել է, որ ռուս խաղաղապահները վերահսկողություն են սահմանել Լաչինի միջանցքում եւ Լաչին ճանապարհի հատվածի՝ Լիսոգորսկի գյուղատնտեսական միավորորումում: «Այսօր Ռուսաստանի Դաշնության Զինված ուժերի կոնտինգենտի ստորաբաժանումները վերահսկողություն են հաստատել Լաչինի միջանցքի եւ Լաչինի ճանապարհի հատվածի՝ Լիսոգորսկի գուղատնտեսական միավորումում ժամանակավոր դիտակետերի տեղադրման միջոցով»,-ասել է նա:
Նրա խոսքով՝ «15-րդ առանձին մոտոհրաձգային բրիգադի առաջին խաղաղապահ գումարտակի ստորաբաժանումները Էրեբունի օդանավակայան ժամանելուց հետո 300 կիլոմետրանոց երթարշավ են իրականացրել եւ ավարտին են հասցնում Գորիս բնակավայրի շրջանում կենտրոնացումը»:
Նա նաեւ նշել է, որ Ղարաբաղում խաղաղապահ ուժերի իրականացման համար կօգտագործվեն բանակային ավիացիա եւ ԱԹՍ համալիրներ: Ռուդսկոյի խոսքով՝ հակամարտության գոտում տեղակայված ռուս բոլոր խաղաղապահներն ունեն սիրիական փորձ: